OPUWO-Omapaterero pendje wovanane vombazu mbehiyazemburukua kotjiveta iyohoromende otja koveta yOmauhonapare wOmbazu nOveta yOmatungururiro wEhi otjina tjimamuso okutarewa mo ohakahana, Otjiuru tjOmahongero mOtjiungura tjOruyameto kEhi ra Kangamua matjitja.
“Morukondua rua Kunene, muna ovanane vombazu ovengi mbehiyazemburukua nu mbehayenene okuhana ehi kove vekongorere mena rokutja kaveya pewa omasa ingo kutja o iyoveta yOmauhonapare wOmbazu poo yOmatungururiro wEhi ra Kangamua,” Louise Shixwameni wapepambarere nao. Tjahungirire kuna onganda yozombuze indji o Nampa kombunda yomahongero womayuva yetano wounepo wOuhonapare wOmbazu wOtjikaoko ohunga nOveta yOmatungururiro wEhi ra Kangamua, Shixwameni watjere ozoveta azeembari inda zeyandjera ovanane vombazu okuyandja ousemba wombazu wehi kove vekongorere.
“Mapehee kutja ovanane vombazu mbazemburukua uriri ombe yandjerua okuyandja ousemba mombazu wehi poo ousemba wokuyazema ehi kovandu mberi kehi younane wawo, tjitjiri otjina tji tjihendeka ounepo woviwana mbuturira movirongo viovanane vombazu mbehiyazemburukua iyohoromende kutja auhaungurisa omayandjero inga okuungurisa ousemba wawo wehi poo okutjangisa ehi rawo,” eye wahandjaurire.
Komurungu Shixwameni wayendekere kutja Oveta yOmauhonapare wOmbazu yo 2000 iri kumui ohunga notjiungura tjovanane vombazu mbehiyazemburukua, nu munao oviwana otjivihendekua. Nai ovanane vombazu mbehiyazemburukua mOrukondua rua Kunene vehinda ovandu vao komauhonapare wombazu ngazemburukua oku tjangisa omausemba wawo wehi, ngeri omaunguriro ngemunika kutja opendje noveta nu nguma ye yenene okuyeta ondjakaha moruyaveze. Shixwameni matja otja komuhunga mbua yarukirua wOtjiungura tjOruyameto Kehi ra Kangamua, mavehepa okuhungirira kepu rovanane vombazu mbehiyazemburukua imba kuna omatiasaneno wo Ministeri yOmananeno wOtukondua Nozongomainde, Omakuizikiro wOmaha nOmekurisiro wOkozombanda.
Nai otjiungura tjoruyameto kehi ra kangamua ihi tjapewa omerizirira yokuhonga ovanane vouhonapare wombazu Oveta yOmatungururiro wEhi ra Kangamua posi nai tjihonga ovanane imba mbazemburukua iyohoromende uriri. Posi Ombara Veziruapi Tjavara wOuhonapare wOmbazu wOtjikaoko wananga ovanane vombazu va Kunene mberi kombanda ya 14 okukara norupa momahongero inga. Ihi tjatuara kokutja ovanane avehe mbehiyazemburukua veningire kutja omahongero inga wina yevasisiwe kovandu vawo. Shixwameni wevetjivisire kutja mavasisa eningira rao indi kovanene movihako kombanda ye kutja vetare mo. Otjiungura tjOruyameto kEhi ra Kangamua tjiwira kehi to Ministeri yOmahi nOmahandurisiro nu tjivaterua notjimariva iyOmbuiko yOmatokero wEserewondo.