WINDHOEK
Iilonga yokutunga opate pokati koKamanjab nOmakange otayi humu nawa komeho ngaashi sha thanekwa. Oshitopolwa shotango shopate ndjoka okwa tegelelwa shi ka pwe okuthika pehulilo lyomvula ndjika. Ondjila ndjoka ya tseyika molwiiponga oyindji, mbyoka hayi etithwa unene komamanya nomasilu otayi tulwa pomuthika omwanawa. Ondondo yotango yondjila yomukaakena gookilometa 204 oya manithwa etata, omanga ookilometa 40 dha egululila nale iiyenditho. Oshitopolwa shoka sha hupa ko shookilometa 60 okwa tegelelwa shi ka pwe okuthika pehulilo lyomvula ndjika. Iilonga yondondo ontiyali yondjila, ano ookilometa 100 okwa tegelelwa yi ka pwe okuthika pehulilo lyomvula twa thinda. Pauyelele womukuluntu goGrinaker LTA pehala mpoka, Wiseman Gqadu, ota ti iilonga yondondo ontiyali oyi na oku ka enda nawa oshoka, oshitopolwa shoka shondjila osha yelekana shi vulithe oshitopolwa shotango shoka sha li nomamanya ogendji, nokwa li tashi pula iilonga oyindji oshowo aaniilonga.
Omolwonkalo ndjika, oshitopolwa oshitiyali itashi ka longwa naana komahangano omashona agehe ngoka kwa li taga longo moshitopolwa shotango shopate. “Omupya omunene, ihe atuhe otwa tseya kutya iilonga yoludhi nduka oyopokathimbo. Otu na omahangano gookondalaka omashona ge li gaheyali ngoka ga thikama po moopelesenda 15 dhiilonga ayihe yokutunga opate, kakele otashi vulika tu ka pumbwe ashike ookampani mbali nenge ndatu moshitopolwa oshitiyali. Etompelo olyo ndika kutya oshitopolwa oshitiyali itashi ka pumbwa unene iilonga oyindji. Okampani kehe oyi na omaunongo moshimpungu shontumba shiilonga, niilonga ngaashi okunenepeka ondjila oshowo yilwe itayi ka pumbwa we iilonga mbika, naamboka haya longo iilonga yoludhi nduka itaya ka pumbiwa we. Shika otashi ti kutya ookampani ashike dhoka tadhi ka longa iilonga ya pumbiwa mondondo ontiyali yondjila odho tadhi ka longa,” Gqadu ta ti.
Pokati mpoka, Omwiindjiniya Omukuluntu mIilonga yOopate, Andreas Helmich, ota ti ookampani dhoka dha likola omaunongo ge nasha niilonga otadhi vulu okukonga iilonga palwe shi ikwatelela kiilonga yooprojeka dhontumba miitopolwa yayooloka moshilongo nokumona uuhupilo.
Ota ti ondondo ontiyali yiilonga yopate oya tamekele sho pwa monika oshimaliwa shokapandi koomiliyuna 171.75 okuza koAfrican Development Bank (ADB) nEpangelo lyaNamibia. Helmich ota ti iilonga yoshitopolwa oshitiyali shongalama okwa li sha katashwa uule womvula yimwe molwaashoka ka pwa li oshimaliwa, noshitopolwa shotango shiilonga osho ashike sha tamekelwe. Ngele oondjila adhihe dhika odha pu, Kamanjab nOpuwo ndjoka yi li oshilandopangelo shoshitopolwa shoka, oondoolopa dhika otadhi ka kala noopate dhopashinanena dha kwatakanithwa noondjila oonene dhomoshilongo.
Ondjila pokati kOmakange nOpuwo oya pwa nale noya li ya egululilwa oshigwana oomwedhi dha zi ko.