Udigu kaumonekere momasiku gomandaha paapa vaporosi kavazugumine yitranahas kovarwi vanare ava kava kere pevero lyonomberewa daTelecom noMinisteli zoyipangura oku vana parapo asi vavape yimaliwa yawo.Konyara nominute tupu dongandi dina kupita kovili zauntazimwe kongurova vaporosi yipo kava tamekere kuzuguma yitranahas nokutoona varwi vanare komatako,mokukambadara asi ngano valihanepo.Vamwe vawo kava tamekere kuduka yipo vaparuke ano vamwe kava perepo asi vafe tupu,oku tava dimbi nonsumo edi vatotere siruwo sokukondjera sirongo simanguruke.Egano lyovaporosi kaligwederereko kehandu lyovantu ava vana kutanta asi Down,Down,Down yirumbu!
Vaporosi kava tengwire monyima paapa vantu ava kava tameke kuzerura nonyongo meguru nokudimba.Ose kuna wizire apa morwa yimaliwa yetu,kapi tuna wizire asi vaya tutoone vaporosi yimo ana kuuyunga gumwe govalyateli oku kuna kulika vaporosi.Gumwe nage kagwedereko asi eyi kuna kumoneka nawa-nawa ngwendi moomu ngavarugana vakwayita vanare woukoloni nye vahepa kuyidiva asi ose twa hepa kukara paapa dogoro vatupe yimaliwa yetu.Opo kava vazugumine yitranhas vakadi vavali novagara vavali kavaremanene komeho,ano mukadona gumwe kagu muzire musi momeho.Vaturoye tupu kapisi varuganese yitranahas yimo ana kutanta Alex Kamwi muuyungilipo komitiye ezi zina kurongikida asi varwi vanare vagwane uwa wawo.Meho gange kuna kukora kuna kukora sili unene,yimo ana kuuyunga mukadi gumwe ogu ana likwaterere keho lyendi lyorumoho.
Ose kuna hara tupu elimbururo morwa sinke navatuhomokera,yimo ana kuuyunga muswamane gumwe,posiruwo ose age mumati gumwe kuna kulira ayuke oku vana kara vaporosi.Vakadi vamwe kuna kara novana vawo ava vana tura monoguwo vanonagona hambara totanta asi makwedi ntazimwe.Mokatji kawo kuna karapo TV ezi vana kutara vantu ava vana handuka oku vana turako mambako yipo ziziguruke.Ose kuvhura turwire eyi tuna diva asi uhunga,edi kadi kere nonkango edi vana kutumbura varwi ava vanare.Sinzi sawo kuna kutanta asi eyi kuna kuvadiworokesa uye wina dakere nomburu ngadi toona vantu ava ngava kondjere sirongo sawo.Morwa sinke vaporosi navaruganena yininke yangesi?nogu ana vape epulisiro yilye?Ose kuna wizire oku tuyamone ministera gweyiyovarwi vanare pampora dokotora Ngarikutuke Tjiriange,morwa yimaliwa yetu nye ntaantani kuna kutu sininika tutundepa morwa sinke?Ose kapi natu tundapo apa dogoro vatupe yimaliwa yetu.Yimo ana kutanta munasipundi gokomitiye ezi Ruusa Malulu.
Ogu kauyungire nage age kuna kara apa kayihorokerere kakere mukurona pamberewa gombunga zountu womuntu Phil yaNangoloh ogu katente asi vaporosi vana rugana epuko mokutoona vantu ava.Kodili nompito dimwe dokuvhura kugusapo udigu ou,kugusako kutoona.Vaporosi vana rugana epuko lyenene.Awo kuna retere vantu ava vagazare eyi ngayihoroka nomvhura dina domo1970.Vakoevoet wovasovagani ngavavatumu vakasopore vasovagani vakwawo ano ava ngava vape yirugana oyo yirumbu.Yimo ana kutanta yaNangoloh,nokugwedeko asi mbunga zendi kapi zina kukwatesako egano eli asi vaporosi vetu ngano vatoone vantu.Ame kapi yina kuhafesange eyi vaporosi vetu vana toona vantu.Vantu vatatu kava remanene yiyo kava vatwere kosipangero saWindhoek soCentral.Navenye kava kere vakadi gumwe katundire mukota,ano gumwe kapi kamwene.Apa kava yimwene asi eyi kapi nayikwasa vaporosi yiyo kavagusire mauta gawo.Awo yiyo kava tengwire vakarete ehauto eli kavayasikamekere komeho zovantu ava.Nompitisili dombunga ezi kuna tokora asi udigu ou woku vasopora nokuvazuguma yitranahas navautwara komberewa zonene zouminsteli zepopero nekungo.
Yimaliwa eyi kapisi yepangero lyaNamibia ayo kwatunda koUN yimo ana kutanta Malulu,nokugwedako asi awo kapi tava tundupo apa dogoro Tjiriange ava pe elimbururo patjangwa.Ekeverero lyovaporosi asi vantu vaharugana yoyidona kalitamekere ngura-ngura komeho vantu ava vakatameke kulyatera,omu kava tere asi monzira zonene ezi vana kutumbura asi Independence Avenue mwahakara mapiyagano.
Mwaza ezuva mukurona govaporosi momukunda gwaKhomas ndi asi Regional Commander Chief Inspector Samuel Hoebeb nakomisare gona govaporosi momukunda ogu Andries van der Byl naAbraham Kanime mukurona govaporosi vaWindhoek kavagazarere asi valikunde novantu ava yipo valizuvhe vatundepo pevango eli.Nye eyi kayikere tupu ngwendi kuna kulihepeka.Vantu ava kava geve mbapira zawo zehundiro nokutokora asi tavarara paapa dogoro vavape elimbururo lyawo.