ONDANGWA
Iilyo yEhangano lyAanafaalama yokoMangetti (Mangetti Farmers Association – MFA) otaya ka ninga oonkundathana nepangelo momasiku 18 Juni nuumvo, naashika oshi li oonkambadhala dhawo okulundulula kashona nakashona omusindano omutiligane nokumona oompito dhevi lyuunapelo kaanafaalama yomiitopolwa yaayehe.
Uuyelele mbuka owa ziilile poshigongi omasiku ga zi ko. Oshigongi shoka sha thanekwa okwa tegelelwa shi ka popithwe kOminista yUunamapya, Omeya nOmakuti, Dr. Nickey Iyambo, oshowo Ominista yOmavi nOmatulululo, Jerry Ekandjo pamwe naaleli yopamuthigululwakalo mOndonga. Nonando aaleli yopamuthigululwakalo mOndonga okwa li ya kala poshigongi shoka sha ningilwe inaya popya sha. Kombinga onkwawo aakwanepangelo kape na nando ogumwe a holokele pomutumba ngoka. Kakele Minista Ekandjo okwa hiya ashike ehangano lyaanafaalama – MFA li tume osheendo shi ye kOvenduka shi ka ye moonkundathana naye. Dr. Iyambo ka kwali aniwa ina ta vulu okuholoka omolweesa dha li megumbo.
Aanafaalama okuza moNooli omathimbo ga zi ko oya kala nokupula neitulomo enene kombinga yevi lyuulithilo omolwuunapelo mboka wa pumba nendumbakano lyiimuna yawo konima sho ya tembudha oonkwandambi dhawo okuza koshitopolwa shaKavango. Oyendji yomaaniimuna oya zile ko koshitopolwa hoka nopethimbo ndika otaya tala koompito dhoka dhi li po okumonena iimuna yawo uunapelo wu li hwepo. Omolwonkalo ndjoka, otaya indile nokupula epangelo kohi yehangano lyawo MFA li ya pe evi lyuulithilo wa gwanenaa oshowo oompito dhomalandithilo giimuna yawo, naashika osho sha etitha ku ka kale oshigongi shoka momasiku 18 Juni nuumvo. Omutumba ngoka kwa li gwa gongalwa kaanafaalama oyendji pOndangwa opwa ulikwa iilyo yokomitiye ya thikama po naanangombe ya za miitopolwa yuulithilo wayooloka. Iilyo mbika oyo: Ismael Shailemo omunashipundi goMFA, ngoka a li nale omutalelisikola, Abednego Nghifikwa, omunambelewa omukuluntu mehangano Old Mutual, Thomas Ndiwakalunga oshowo ngoka a li nale Ngoloneya goshitopolwa shaShikoto, Hosea Nampula, omunangeshefa pOkalongo, Shikuma Shilongo, ngoka a li nale Meya gwaNdangwa, Priskilla Kauna Nashandi, Martin Haikali naPetrus Shipepe omunafaalama a za moshitopolwa shaMusati.
Oshigongi shoka osha kundathana iinima oyindji ya guma aaniimuna yomiitopolwa yaayehe, unene oshinima shomusinda omutiligane. Otaya indile epangelo li lundulule kashona nakashona omusinda omutiligane. Kakele kaashoka, aanafaalama oya nyanyukilwa wo omalongekidho gepangelo okutota po omahala guunapelo moshitopolwa shUudhuvidhiya mOshana oshowo Omutambogwomawe mOmusati. Yimwe yomiikundathanwa mbyoka otayi ka kala oshitopolwa shiikundathanwa mbyoka momasiku 18 Juni sho ehangano lyaaniimuna MFA tali ka tula omakaya kombiga nokukundathana naanambelewa yUuministeli wOmavi nOmatulululo. Oshinima shimwe sha etwa pomutumba ngoka osho shoka shomagumbo ogendji noondingosho odhindji unene noonkondo moshitopolwa shaMangetti oshowo omahala galwe guulithilo. Osha popiwa mpoka kutya iilonga yomomapya nuuniimuna ihayi longwa we nuudhiginini miitopolwa mbyoka oshoka aasita yiimuna ohaya kala ashike taya elaela puundingosho. Paempito dhimwe aasitangombe ohayi itula momaihumbato ga nika oshiponga.
Oshikwawo, omagumbo giiti inaga halikila miitopolwa mbyoka oshoka ngele iitopolwa mbika oya ningi yomalukalwa nena shika otashi ka guma nayi noonkondo iilonga yoohambo.
Omunashipundi goMFA, Shailemo okwiindile aanafaalama yakwawo ya dhiladhile kombinga yOndungethaneko yomumvo 2030, ndjoka itayi vulu nando okupondola sha ngele oondingosho nomagumbo giiti oga pitikwa ga dhane onkandangala miitopolwa mbyoka ya nuninwa oohambo.