OSHAKATI
Omupresidende Hifikepunye Pohamba pamwe nameme Penexupifo Pohamba okwa li ya talela po iihakanwa yomeya gefundja pEndiki lyIipindi pOngwediva oshowo pOkapale kEmanguluko mOshakati mOmaandaha.
Aantu oyendji okwa li ya pewa omahala gokukala pakathimbo pEndiki lyIipindi pOngwediva oshowo pOkapale kOmaudhano kEmanguluko mOshakati konima sho omagumbo gawo ga yuulilwa komeya gefundja. Omupresidende ngoka a adhika e li koEthiopia sho iitopolwa yokoNooli ya yuulilwa komeya, okwe yile koshitopolwa shika opo a tale nomeho ge yemwene onkalo yefundja. Mwene gwOshilongo okwa tegelelwa a ka kundaneke okabinete shi nasha nonkalo nkene yi li omanga epangelo inali kutha oonkatu okugandja omakwatho kaakwashigwana mboka ya gumwa konkalo yefundja.
“Otandi ke ya kuthila ko kushoka nda mona – kutya omagumbo gaakwashigwana oge li kohi yomeya noshowo kutya oya tembudhwa mo momagumbo gawo,” osho omupresidende a tseyithile aatoolinkundana pethimbo lyetalelopo lye moshitopolwa.
Ota ti ombedhi itayi pewa ashike aantu mboka ya dhika omagumbo gawo pomahala ngoka ga nika okuyuulilwa miitopolwa, ndele oku shi wo okutalwa kiishana niitalamimeya mbyoka ya kundukidha Ondoolopa ayihe yaShakati. Omupresidende ota ti onkalo ndjika nayi ninge oshilongwa kelelo lyondoolopa, elelo lyopashitopolwa oshowo epangelo lyopokati nkene iikondo mbika tayi vulu okukonga omikalo dhokugamena iihakanwa yomafundja nokukatuka oonkatu dha pumbiwa okuyanda onkalo ya faathana monakuyiwa.
Okwa li wo a talele po Ontopa yaKatana nEndola ndjoka ya teywa po komeya omadhigu gefundja. Pohamba okwa pupula kombunda epangelo lyopokati, aanangeshefa nehangano lyomushigakano omutiligane sho ya gandja omakwatho kiihakanwa yefundja. Aantu ya dhengwa konkalo yefundja oya lombwele Omupresidende kutya yo oya silwa lela oshimpwiyu nokupewa omakwatho ga pumbiwa. Pokati mpoka, Ominista yOonzo dhomEfuta, Dr. Abraham Iyambo okwa gandja omagano goohi dhomoondooha kiihakanwa yefundja mEtinano mOshakati. Iipakete yoohi oya topolelwa aantu mboka ya gumwa kefundja pEndiki lyIipindi pOngwediva nOkapale kOmaudhano kEmanguluko mOshakati. Ominista oya gandja omakwatho ngaka konima yo ya tala konkalo neyonagulo ndyoka lya etithwa komeya gefundja, unene momalukanda giinyakwi moka aantu mboka petameko ya li ashike 500 nomuyalu gwawo ogwa londo sigo aakwashigwana 858 mboka ya tembudhwa kefundja. Pokati mpoka, aaniilonga yOshikondo shIilonga yOpaulumompumbwe okuza mOmbelewa yOmuprimaminista mOlyomakaya oya thikile mOshakati okukonakona onkalo yefundja. Oshikondo shika osha gandja iipakete 100 yomakunde, oondooha dhoohi 2 400, uushako wuusila wepungu 104 wokilograma ntano, oshowo mboka uushona 2.5kg wu li 256, oombapila dhokuundjugo 939 nuushako wosuuka 2k wu li 398. Osheendo osha gandja uuthemba kokomitiye yiilonga yopaulumompumbwe moshitopolwa opo yi lande iipumbiwanima kehe mbyoka tayi pumbiwa kiihakanwa yefundja nokutuma uusilepa womalandelo kOmbelewa yOmuprimaminista opo ya futilwe oshimaliwa shoka ya longitha. Osheendo shoka okwa li sha kwatelwa komeho kuAmushanga Omukuluntu mOmbelewa yOmuprimaminista, mene Nangula Mbako, Omupehakuluntuwiliki gOshikondo shIilonga yOpaulomompumbwe, Gabriel Kangowa, Amushanga Omukuluntu mUuministeli wOmapangelo gOpaitopolwa, Oondoolopa, Omagumbo nOmapendulopo gOkomikunda, Erastus Negonga oshowo Amushanga ta kalelele mUuministeli wUunamapya, Andrew Ndishishi.
Oongavena yIitopolwa ngaashi Ohangwena, Usko Nghaamwa, Ngavena gwaShana, Clemens Kashuupulwa oshowo Sacky Kayone gwOmusati, oya taamba ko osheendo shoka. Aaniilonga yOshikondo shIilonga yOpaulomompumbwe pamwe noongoloneya yatatu oya yi ihe molweendo nedhagadhaga okutala eyonagulo lya etwa komeya gefundja. Ontopoa yaMpundja ndjoka kwa li yi li pokuteka po ngashingeyi oya teywa po thilu.
Omeya gefundja otaku hokololwa kutya otaga tondoka natango noonkondo.
Aanangeshefa yamwe mOngwediva nOshakati oya gandja omakwatho giipumbiwanima kiihakanwa yefundja. Oongeshefa dhika ongaashi Fysal Fresh Producer, Mazizi Lodge, Benni’s Entertainment Park, Koneka Social Club, Indian Mini Market, Brener Fruits oshowo Africa Stadt Hotel.