MoVenduka
Congress of Democrats (CoD), mpanguro zawo zina tameke ndi asi kazitamekere momandaha aga ganapuko, kompanguro zonene. Mupanguli Louis Muller kakandwirepo egano lya Nora Schimming – Chase, omu kahundilire asi nonkango edi vadirundurure kezuva peke.
Konyima tupu apa kava purakenene kegano olyo hambara ngura-ngura nazinye kwa Herman Oosthuizen kakererepo Schimming – Chase ndi asi mbunga za Schimming ano Theo Nel ogu kakarerepo Ben Ulenga. Muller kakandwire ehundiro olyo nokuhundira vahahende vayatemeke noyiuyungwa kositenguko. Nampili ngoso mokutameka tupu mpanguro yiyo kava zihagekesere ziyatameke mouvali morwa Oosthuizen kapi kaliwapayikilire siuyungwa sendi, age kaliwapayikilire tupu ehunduro asi mpanguro vazirundurure. Nel gwa Ulenga nage kaperepo asi ehundiro lyangesi kapi vana lituramo nosiruwo nahena kapi lina kara nomulyo. Kumwe nokuvatantera asi vakarelipo va Schimming Chase ngano kava hundilire vahahende vana kutumbura asi Koep and Partners vavatulire marongikido siruwo oso kava kere ponze zomberewa. Nel kaperepo asi kapi yina kara hepero asi vavape siruwo, vahepa kulipa vene umbondo. Ntani kava yimwene mezuva olyo asi mbunga za Chase kuna kunana noudigu mokufuta vahahende vawo.
Eyi kwatwaredera vahahende vawo vapire kufira sinka nonkango edi morwa kapi navagwanamo yuma. Age simpe kavatanterere asi yitundwamo yo Congress kwa tura mbunga Politika ezi moudigu, awo hena vantu vaChase kwagava yitumbura yoyidona konompitisili dombunga ezi.
Nsene kapi vana kuyipangura ngesi edina lyombunga ezi talizonauka rambangako nono mpitisili dawo.
Age kagwedere ko asi kutunda tupu posimpagwa oso kwato yiviyauka yo mbunga ezi yatompoka. Udigu wa CoD kwatameka tupu mvhura ezi zina pu konyima zepongo lyawo mo Keetmanshoop. Ignatius Shihwameni ogu ana tundumo ngesi mombunga ezi kwarumbasanene na Ulenga nye age kwa gwene tupu mazwi 14.
Vakwami vendi namwene kwadukiremo mevango lyo congress nokutante asi mahoroworo ogo kapi gana gendipo nawa. Ano Ulenga age asi mahoroworo gana wapa.
Moomo nye wazire udigu owo vatatu ava vakara mombongarero zanavenye kwatuliremo ehundiro kompanguro paapa Ulenga gahere kuvatjida mombunga Politika. Mpanguro kaziyatwikilire mouvali povili zo 09h00.