BALIMI mwa sikiliti sa Caprivi seba kupilwe kuli ba sike ba ca nama ya limunanu za bona kapa kuli kamaisa mutakafululele mwa nako ya cwale kakuli seku eshize butuku bwa taku ni mulomo mwa sikiliti ili butuku bobu taluswa kuli nebu kalezi mwa munzi wa Nankuntwe, libima ze 130 mwa mutulo wa tolopo ya Katima Mulilo mwa mazazi a felile.
Ba Liluko leli bona za pabalelo ya limunanu ni lifolofolo mwa sikiliti neba kile ba patalaza kaza lilimaniso ye ya kuipulaela feela limunanu ni kuca nama ya zona ka kubulela kuli lilimaniso ita konwa feela kunanulwa muta lika li yema hande kwa mafelo a lizazi.
Lilimaniso ya cwale ye ita hatiswa fa mikwakwa kamukana hamohocwalo mi mapokola bata bona kuli ba eza musebezi ni kwa museto wa nuka ya Lyambai.
Likwata za licaziba seli keni mwa libaka ze shelana za sikiliti kuli li kone kueza lipatisiso kaza likayamana le.
Kakuya ka muofisa yo muhulu mwa Liluko leli bona za pabalelo ya limunanu ni lifolofolo, Dr Otto Huebschle, likomu za palo ya 23 hala likomu ze 2 307 lina ni lisupo hamohocwalo ni likolofalo ze akalezwa kuli ki za bona butuku tuna bo bwa taku ni mulomo.
Na ekelize kubulela kuli lisupo kamukana ze lita lumelwa kwa naha Botswana kuli li konwe kubonwa nji ki ona makulano a swana kapa awa ili kuli ku konwe kunitifazwa tota.
Muofisa yo muhulu na zwezipili kubulela kuli butuku bwa taku ni mulomo ki butuku tuna bobu kona kutakalala ni haike likulube kapa lipelesa hala limunanu zen`wi.
Butuku habu takalali luna bo kamunu.
Lisupo ze kona kubonahala fa limunanu li konwa kubonwa ka litombo fa lulimi, mulomo, mautu ni kwa mazwele a limunanu.
Han`ata limunanu za lona likayamana le, li lota ahulu lifulo mi hali kwanisi nihaike kuca mi haiba kuli za anyisa li tobelwa ki muzilili o mun`ata.
Litombo zen`wi li kona kutisa matata mwa kuzamaya kwa limunanu mi kacwalo balimi ba kupiwa kubiha lisupo kaufeela zeba sa boni hande kwa limunanu za bona kwa ofesi ya bapalelo ya limunanu ni lifolofolo mwa sikiliti ili kuli li konwe kutatubiwa ka bubebe.