Omupresidente woshilongo Netumbo Nandi- Ndaitwah onghela okwa waimina pamwe Ovanamibia aveshe, mokutyapula edimbuluko lefiku leenyiki, olo la shiivika nawa ongaWorld Bee Day”. 

Metumwalaka la shangwa okudilila mombelewa yomutwe woshilongo, ola tumbula kutya Omupresidente Nandi-Ndaitwah okwa yelifa kutya ye eshi a waimina pamwe novakalimo vomoshilongo shaye mokudimbuluka efiku eli, okwa hala oku va dimbulukifa efimano leenyiki mounyuni. 

“Eenyiki ohadi dana onghandangala yakula mokutandavelifa ombuto iwa, okudja koshimeno shimwe, ya ukifa koshimeno shikwao, opo ombuto iwa i dule okweetwa po,” ta ti. 

Okwa twikila kutya mokudimbuluka efiku ngaashi eli, natango otashi eta ekwatafano liwa pokati kovanhu noushitwe omo mwa kwatelwa oimeno oshoyo oininamwenyo oyo ihole oimeno ngaashi eenyiki. 

“Ame onga omukulunhu oshoyo omutwe weenyiki moNamibia, onda hala ovakawashiwana ava vena oshinakuwanifa shokufila eenyiki oshisho, osho yo ovanambelelwa okudilila koimunisteli womidingonoko, eefuka nomapashiyono va twikile nokufila oinimamwenyo ei oshisho,” ta ti. 

Okwa yelifa kutya ei nai kale yoo omhito iwa yokunongeka ovanyasha efimano leenyiki, oilonga hai longwa keenyiki noku di kaleka po di li monghalo i li nawa, noya amenwa. 

Omupresidente okwa ti yoo fyee ovanhu otwa pumbwa oushitwe shinene, shi dulife nghee oushitwe wetupumbwa. 

Okwa ti ngeenge oushitwe kaupo ile fyee ovakwashiwana otwe u nyonopo, nena ngaho otwa mona oixuna shee otwa dipaya noho. 

“Tu fileni omidingonoko detu dopaushitwe oshisho, shaashi koshi youshitwe okuna oinamwenyo ina efimano lakula moshiwana,” ta ti. 

Okwa ti Namibia okwe li pyakidila noku kwafela oikondo keshe tai fiilile oushitwe oshisho, oshoyo oku yandja ounongo unasha nefimano loinima ei. 

– taimihaihambo2000@gmail.com