WINDHOEK
Omupresidende gwOngundu yoSwapo Sam Nujoma ota ti ongundu ompe Rally for Democracy and Progress (RDP), inayi ipopila nando nomashongo ngoka ga taalela Aanamibia mokwiikongela aayambidhidhi nokuhumitha komeho omalalakano gawo guufukedhi. Pethimbo ta egulula pambelewa oshigongi shongundumutima yoSwapo (Swapo Central Committee) mOsoondaha, Nujoma ota ti oyendji yomaakomeho yoRDP oya li iilyo iinene mOngundu yoSwapo mboka kwa li yi inekelelwa iinakugwanithwa ya simana okweeta po oompito dhiilonga. Ta ti aantu mbaka oyo ya li aatonateli yooprojeka nomahangano ngaashi Pidico, DBC, NDC, Patriotic Construction Company, ODC, Namib Contract Haulage, Kalahari Holdings oshowo galwe, ihe oye ga shundula noku ga halakanitha po. Omahangano ngoka okwa li ga totwa po nelalakano okweeta po oompito dhiilonga kAanamibia omayovi ihe oga hulile muunyengwi omolwuufukedhi waaleli mboka. “Iihuna oyi thike peni, opo ya hala ngashingeyi okugandja oompito dhi li nawa ngele oya kengelela nale oshigwana shaNamibia omimvo odhindji?”
Nujoma ota ti Aanamibia oye na okutala ko aanapolitika mbaka ya ndopa nale monakuziwa kutya osho awike ye li ngaaka. Ta ti iilyo ayihe yOngundu yoSwapo nAanamibia ayehe oye na okukala ya lungama nokukotoka kaa ya pukithwe kiifundja nomikalo dhuukengeleledhi tadhi taandelithwa kaantu mboka kaa ye na uushili noya nika uulingilingi. Omukokolipresidende ota ti Ongundu yoSwapo inayi kanitha nando ondjila nomalalakano gayo, ihe otayi pula komeho.
“Otwa eta po Ondungethaneko yomumvo 2030 ndjoka yi li olamba yuuyelele mondjila yetu yondondo ontiyali yekondjelomanguluko lyeithikamenopo lyetu lyopaliko.” Ta gwedha po kutya elalakano alihe lyopapolotika oli li notali kala okuyambula po nokutunga po uuyuuki wopankalathano yoshigwana moka Aanamibia ayehe taya ka kala ya mona oompito dhokuthika pomayakulo agehe ga simana okulumba nokutyapula onkalamwenyo yi li nawa. Nujoma okwiindile eihumbatonawa nevuliko mewiliko lyongundu. “Otu na okwiihumbata nokuvulika oshowo okusimanekathana opo kushilipalekwe kutya Ongundu yoSwapo otayi tsikile okusimanekwa nokwiinekelwa kAanamibia.”
Okwiindile iilyo yongundu yi kale aluhe nokuyambula po ombepo yuukumwe, eitulomo lyopangundu oshowo eimangokumwe mokati kiilyo ayihe.
Oshigongi shongundumutima yongundu yoSwapo okwa li sha tala wo kiiyetwapo yoPolitburo nokugandja iitsa yi na okukundathanwa kokongressa ontine yongundu ndjika ndjoka ya gongalele okutameka metiyali poSafari Hotel mOvenduka.
Omutumba ogwa tala wo kaaulikwa yoPolitburo ye nasha noonkatu dhopombanda ne mongundu yoSwapo. Omupresidende Hifikepunye Pohamba okwa li a ulikwa ongomupresidende gwongundu, ngoka a li omuprimaminista gwotango, Hage Geingob okwa ulikwa omupehapresidende omanga John Pandeni, Ngarikutuke Tjiriange naPendukeni Iivula-Ithana ye li methigathano lyonkatu yuuhamushangandjayi wongundu.
Otaku fofokwa kutya Pandeni otashi vulika e ki ikuthe mo methigathano ndika opo a gandje olweedhe kuIivula-Ithana a kuthe po oshipundi shika. Oyendji oye na eineekelo eshona Tjiriange a ka shune ko koshipundi. Nangolo Mbumba okwa nothelwa ko a mone onkatu yuupehamushangandjayi, onkatu ndjoka taya kondjele naNetumbo Nandi-Ndaitwah.
Pokati mpoka, Omupresidende Hifikepunye Pohamba okwa ti iilyo yongundu yoSwapo oyi na okupashukila nolungamena mboka taya hwahwameke evundakano netopauko mongundu.
“Otu na okukotokela mboka taya longo nelalakano okunkundipaleka nokuhanagula po ongundu.” Omupresidende Pohamba dhika okwe dhi popi metiyali pethimbo ta egulula pambelewa Okongressa ontine yongundu yoSwapo. Ta ti yamwe yomaatembuki mongundu yoSwapo oye na epopyo kutya otaya ka “nkundipaleka Ongundu yoSwapo, onkee omu na okwiigamena neyene meni lyongundu,” komatanga ngoka ge na opulana okuhanagula po ongundu.
Pohamba ta ti etsikilo lyetulomiilonga lyoproholama yongundu yi nasha nopolotika oli ikwatelela kuukwatya noonkondo dhiilyo yongundu okukala aadhiginini momalalakano gwongundu yoSwapo nokwiimanga kumwe uukuni.
“Natu kotokeleni uukwamuhoko, omakuyunguto ge nasha nomayoolokathano gaantu oohandimwe, nokwiiyageka okwaanevuliko hoka taku fala menkundipaleko lyomaukwatya ga simana gwongundu, ekuyunguto mokati kaakwashigwana nokuteya omukumo iilyo yetu yimwe mbyoka iidhiginini mehangano lyetu.”
Pohamba ota ti ongundu oyi na okutala nuukeka kelongo nepashulo lyoshigwana tali tsikile shi nasha nopolotika yiilyo yawo, opo kushilipalekwe kutya oye li lela iilyo yoshili yehangano ndele kaye shi awike aahumbati yuukalata wuukwashilyo wongundu. Ta gwedha po kutya Ewawa lyAagundjuka olya pumbwa wo eyambidhidho opo li vule okundungika nokweenditha po aanyanyamagulu kombinga yoohedhi nomithigululwakalo dhongundu, pamukalo ngoka tagu ya kwatha monakuyiwa ya ka kuthe po iipundi melelo lyongundu ngele ethimbo lya thikana oshowo okukala ye na euvoko lyayela kombinga yiinakugwanithwa yawo.
Omupresidende ota ti oshitsa sha simana okuungaunga noshimpwiyu shokunkondopaleka nokuyambula po ongundu yoSwapo oshi na okwiikwatelela keuvoko ndika kutya elunduluko lyopankalathano moshilongo itali vulu okuholoka po ngele kape na aantu mboka ye na euvoko neitulomo okweetitha po elunduluko ndika.
Pohamba ota ti ngaashi monakuziwa, elalakano lyongundu otali pula egameno lyomauwanawa gwoshigwana oshowo okumonena aakwashigwana omayakulo ga nuka po.
“Shika otashi pula uukwawowanankali naamboka ye li monkalo yoluhepo, emanguluko lyaamboka ya dhindilwa kongudhi oshowo uuyuuki wopankalathano kumboka ya liwa oshipungo.”