BALIMI mwa sikiliti sa Caprivi basa zwelapili ku utwiswa pili butuku ka libaka la butuku tuna bwa taku ni mulomo bose bu apesize sikiliti kamukana ni kuzwelapili kutisa likayamana mwa libaka ni lilalanda ze shelana za sikiliti.
Ba liluko leli bona za Pabalelo ya Limunanu ni Lifolofolo mwa sikiliti neba kile ba patalaza sunda ye felile kuli, neba kile ba swala sisupo zenca zen`wi mwa munzi wa Malindi libima ze mashumi a manee (40) mwa mutulo wa sikiliti sa Caprivi.
Muofisa yo muhulu wa liluko leli swana mwa tolopo, mutompehi Frank Chitate na kile a nitifaza kaza lisupo zenca ze sunda ye felile ka kubulela kuli, likomu zen`wi neli kile za supeza lisupo za bona butuku tuna bo cwale mwa munzi wani.
Litatubo za lisupo zen`wi neli kilwe za lumelwa mwa naha Botswana mwa mazazi a felile kuli ku nitifazwe tota.
Minzi yen`wi yese boni likayamana la butuku bo ki ye cwale ka Nankuntwe ni Muzii.
Kakuya ka chitate, fa palo ye likana 45 000 ya likomu mwa sikiliti, 32 000 kuyona se fumani mupendo.
Mupendo u kulubelwa kuli uta mata haisi mwa kweli ya N`ulule haina ni mazazi a lishumi ka malalu.
Lipiho zene zwelela mwa naha Botswana kuamana ni litatubo neli supelize kuli, sikiliti sa Caprivi si katalizwe ki mufuta o m un`wi wa taku ni mulomo o zibahala ka SAT 2.
Chitate na kile a fitisa mamela ya kusa ikamaiseza feela likomu mutakafululele mwa sikiliti.
Na kile a patalaza kaza tabo ya hae kuamana ni kamo bayahi banze ba seli kuswalisana ni mungendenge wa mupendo wa ofesi ya hae.
“Lunze lu utwa kuli ba ban`wi batu banze ba sweli kuno tutisa likomu kuzwa mutulo wa sikiliti ni kutisa mwa libaka zen`wi.
Lunze lu patehile ni lipatisiso mi haiba mutu kapa batu inge ba swaliwa luta lika katata luli kuli batu ba ba swaliwe ni kufiwa koto ye swanela kakuya ka mulao,” Chitate na fitisize mamela.
Na kile a nitifaza kuli butuku bwa taku ni mulomo ki butuku bobu yambukela mi kuikamaela mutakafululele kwa likomu ku kona kutisa likayamana.
Lipatisiso za kulika kubona kuli kanti hee likayamana neli zwezi kai linze li zwelapili.
Mwa mazazi a cwale, hakuna lisupo za butuku zese bonwi mwa libaka ze cwale ka Kasika-munzi o zibahala ahulu ka kuba mafulelo a linali ni lifolofolo zen`wi kakuli ki munzi oli mabapa ni sibaka sa pukelezo ya lifolofolo mwa naha Botswana ili sibaka sesi zibahala ka Chobe National Park.
Chitate u akaleza kuli kakuli butuku nebu kilwe bwa bonwa sapili mwa libaka ze mabapa ni nuka ya Lyambai, u bona kuli mwendi butuku nebu keni kuzwelela mwa naha Zambia.
Lisupo zen`wi za butuku neli bihilwe mwa naha Zambia mwa libaka ze cwale ka Sesheke, Mwandi ni Kasaya kwa mukulo wa nuka.
Ze ni halilicwana, maofisa ba mubuso seba hatisize mungendenge wa fa mukwakwa wa kubona kuli nama ni likomu hali ikamaeli feela mutakafululele.
Mapokola mwa sikiliti neba kile ba swala likomu zene zwelela naha Zambia zene fumanwi inge li fula kwa tuko ni museto wa Wenela sunda ye felile.
Likomu neli kilwe za lukululwa muta li fumanwa kuli halina butuku tuna bo ki licaziba za lifolofolo.
Limbule ze cwale ka bucwan`i ni mataka, musutelo ni likota kubeya litalo hala limbule zen`wi seli hanisizwe fa mikwakwa haisi nako yeo sikiliti sita bihiwa kuli si yemi hande hakuamanwa ni butuku bo.
Ba Meatco ni bona seba tuhezi mingendenge ya bona ya kulekisa nama kakuli ka kuya ka mulao sibaka sesi fumaneha kuli si inzi mwa likayamana leli taluswa le, si swanela kusiya mingendenge kaufeela haisi muta kufita likweli nihaike ze silezi.