OTJOMUISE- Otjovandu mbakondja pamwe mokukondjisa okukutura o Namibia numberikutire kumwe mongondjero indji nandarire kutja vevari pamwe vovandu imba nai kavetjiko kombandahi, ongutasaneno indji maikayenda komurungu.
Vevari vovandu imba mbeheriko, ovayaruke Hendrik Witbooi na Kuaima Riruako nai mavekaenda komurungu okukutwa kumwe nomirari mbya rukirwa kuvyo novyo aviyetatu mbinopona pumavihayenene nu munao ovivekutu kunomurari imbwi o Sam Nujoma. Omurari imbwi o Hendrik Witbooi mbwawavesapo irukuta kunaimbwi o San Nujoma wina mbwavasewako motjihuro tja Tjomuise. Kuwo nai otjikwerikutu omurari imbwi Dr Kuaima Riruako, owo moutokero wotjihuro mbumauhakayene kunaimbwi o Hendrik Witbooi.
Omurari imbwi o Bach Oritjatatu otjiwarukirirwe o Dr Kuaima Riruako. Omongondjero yorata yotjira tjo NUDO motjihuro, Joseph Kauandenge, nawina Ouhonapare wOmbazu wOvaherero. Omanigniriro wawo yaitaverwa iyotjirata tjotjihuro nokuhina pari norata imwe ndjeri twara peke mohani okupirura eningira indi. Ondero yari kokutja omurari imbwi o Shanghai mOkatutura arire mbwarukirurirwa momuyaruke Riruako. Nandaku pakarere nao okutja owo avevari atjavepukata orupa rotjiwana tja Katutura, tjinene momaturiro ingo makuru wOvaherero nOvambanderu tjinga orupa indwi atjarukara pokati komirari aviyevari imbwi omupe waomuyaruke Riruako nandaku pakarere nao, naimbo mukuru mbukapitira mene yokomando owo rukuru mbwarukururirwa komuyaruke Clemence Kapuuo.
Posya ngunda aperi nai omuyaruke ombara otjitambi Riruako nai warukururirwe komurari imbwi o Bach, ndiri ena romundoitji omwiimbure ee nandarire nguhina kutja were muno mohuurire yehi rOvandoitji nu no ena kaparukaze ndihina orupe no Namibia kutja omoruveze rohuurire yehindo poo omomwano warwe kangamwa. Munao mena rokutja wina omurari ibmwi uri motjihuro mapea onawa owo nambano tjimautjikirwa komuyaruke Riruako tjinga auri wina omurari mbuungurisiwa tjinene novandu peke peke muvetuurungira, tjinene ovayenda novandu vomauye wopendje. Owo wina omurari omure mbuutira ape mene yondondu yonyoka nganda auyekuhaka momahitiro wokomamuho wonasareta yohoromende yomotjihuro nai pozomberoo wina zoministeri yOuveruke.
Otjitjitwa ihi tjananene ombango yovengi tjinene ovahungire veraka rotjiwana mumwari ozombara zOuhonapare wOmbazu wOvaherero, Ruben Wazukua¿i Rukambe, Tjitana Kavei na Saate Uandara notjimbumba tjitjari momuzaro wombazu. Otjimbumba kehi ya Majora Erica Kandorozu tjanyanukisire ovanangwa noutjina, muvyarwe peke
peke.