ǀAEǁGAMS – Kai ǂhâsib ge hâ !gao!gao tsî ǂhâǂhâsa !oabadi !ā!khōmais ra mādi, aiǁgause ǁgam-i tsî ǂkhari-omn tsîna hoa ǂhâsigu xa ra mâǂoase ǁgaumâisa tsî nēs !nâ-ū hepatitis Es khoraǂuisensa ǁkhaesa ǂgui ǁanǂgāsaben nēs xa ǀgaisase ra tsâkhāhe xui-ao. ǀAeǁgams !Ā!khōmais di ǂgiǂgosi ǀawemā-aos, Loide Kaiyamos ge ǁnāpas ge !onkhao hâse gere tsēdīhe Hoa !Hūbaisi Tsēs !omna ǁās dis di gowaǀîsas gere Goreangab ǂnaumâiǁanǁguib !nâ mā soab ai ǂoago wekheb Donertaxtsēs ai ǁhao-aona ge mîba. Nē ǁaxasib ge Mantaxtsēs 15 ǂNūǁnâiseb dis ai ge ǂnāǁnâ.Kaiyamos ge ǁîs di gowaǀîs !nâ ge mî, ǂurusib tsî !anuse tsî !anu ǂnamipeb !nâ hâs di ǂgaoǂgao!nâs axasin nî ǂâisa !anu ǁgam-i tsî sē-i ǀkha !omna ǁās tsîna !khōǂgāsa. “!Hau!hausase, i ge ra ǁgau hepatitis Es di khoraǂuisens ra ai!gûsa nausa di ǁgūtsâde hâ nēsa ǁkhaesa hîa,” tis ge ge mî. Ministeris ǂUrusib tsî ǀHûhâsib !Oabadi dis ge ǂhaitsise tsî hoan ǂâisa nî ǂnûi-aihese khoraǂuisens hepatitis Es disa ǂoago kurib 14 Hôasoreb dis ai ge ǂanǂan. Nēsis kōse di ge 3,630 !nae!khaidi hepatitis Es dide a !nurisa, hū ǀkharigu Namibiab di disihakaǀa ǀkharigu digu !nâ. ǁKhāti i ge nēsis kōse 31 khoen ge ûiga a ǂoa!nâse ra !nurihe ǁîde xun 14 !naes ǀkha ge hâ ǁōgu ase ge a !nurihese. Nē Hoa !Hūbaisi Tsēs !omna ǁās dis ge ǂurusib tsî !anuse hâs ai!gû kais tsî ǂgaoǂgao!nâs di ǁkhâb ǀkha gere !gûǀhao hîa ǁkhā ǁaxasib tawa ǂâisa gere ǂûi-aihese. ǀAeǁgams !Ā!khōmais, United Nations ǀGôaron ǂGaes (UNICEF), Namibiab Red Cross ǂNûiǂgās tsî nau hâ !kharaga !âǀhuru-aon tsîn ge ǁkhāti ge ǂgaeǀhao hâ I, în ǂhâǂhâsasib !omna ǁās dib ǂnamipe ǁgamǁare tsî oresa mā. Kaiyamos ge ge mî, nē ǁâudīb tsî ǂâiǂzisens di ǁgūbas ge !omna ǁgam-i tsî sē-i ǀkha ǁās di hōhō!nâs tsî mâtis ǁnāsa nî hui ǁōna ǀhûhâsigu !nâ ǁkhaesa, !gōsase hepatitis Esas ai hâ isa. Nē ǀhaos di ǂgaiǂams ge “!Anu !omgu- ǂurusib ǀawemās ase,” ti ge hâ i. “A da nē ǂgaiǂams xa hoaǁae ǂâiǂâi!nâhe tsî !omna ǁāsa sada ûigu di tsēkorobe !âs ase ǁnaeti kaisen ǂnuwi,” tis ge Kaiyamosa ge ǀamǀam.