Matheus Hamutenyab tsî Maria Amakalis
ǀAEǁGAMS- ǁKharas ǀKharib !nâ ǁgoe Neckartal ǁKhaeb ge ǁaupexa N$5.7 biljun maris ai go dītoahe, tib ge Minister Alpheus !Naruseb, Ministeris !Hanaǂgās, ǁGam-i tsî Haiǂgās diba ge ǂanǂan. !Naruseb ge nē ǂanǂansa ǂoago wekheb di Fraitaxtsēs aib ge ǂhanusi ǁkhaeǁnâs nē ǁkhaeb disa gere dī soab ai ǀkharisi ǀawemā!nande ge mā. “Tita ge kai ǂkhîb ǀkha nē ǂanǂansa ra mā du, kaise go gaxuse !âuhe hâ i Neckertal ǁKhaeb go a dītoahesa tsî !âus ǀguisa hî hâsa nē !goaxa ǀnanub ǁaeb !nâ ǁgam-e ǁkhaesa,” tib ge ge mî. !Naruseb hîa ǀgūǁae nē ǁkhaeba sari hâ ib ge ge mî, kurus sîsengu ge a dītoahe tsîb ǁkhaeba 100 persentga ǂkhîǂâixa tsî ǀgau hâ !harib ai dītoasa !khaisa. Nē ǁkhaeb di kurus ge 2013ǁî kurib ai ge ǂnāǁnâ tsî tendersa Salini-Impregilo ǂnûiǂgās xa ge danhe ǁnāpa ge hâ i tender ǁgoaǂuis dans khao!gâ tsî da ge nēsi koro kurigu khao!gâ nē ǁkhaeba ǀǂgaoǀkhādi ai ra dīǀoaǀoase tsî ǀnanub ǀguiba !âu hâse go !khō!oa. Tsoatsoas aib ge nē ǁkhaeba nausa N$3.2 biljuns ai gere ǀnōǀnōhe xawes ge nē marisa kurigu ra īse ge ǂharo. ǀNî mâsigu nē maris ǀgapis digu ge aiǁgause xoaǁguisa kurus nē ǁkhaeb dis di ǁaeb !nâ gere hâ !onkhaodi marin !nubusigu xa gere !aromahese ge hâ tsîn ge hoan ra ǀarosen soab ai nē ǂganǀgauba N$5.7 biljuns ai go ǀam. Nē maris ǁkhāsib ge permanende sekretareb, Percy Misikab xa ge māhe ǁnāpab ge nē ǁkhaeba nē kurib di !khanni !nâ sari hâ is khao!gâ. Neckertal ǁKhaeb hîa !Autsawises ǁHûi!nâǂharis, ǁKharas ǀKharib dis !nâ ǁgoeb ge ǁaupexa 80 meterga a ǀgapi tsî 880 miljun kubike metergu ǁgam-e a tani ǁkhā. Neckertal ǁKhaeb ge nēsisa ǁîb hoan xa a kai ǁkhaeb ase Namibiab !nâ nî ǂansa tsî 300 000 Olympise tsâ!nâǁkhaegu ǁkhāsiba ūhâse a ǀgoweǀnōhe ǁkhā.