Manchester United oku li moshiponga uule wiikakomumvo yokatanga kokoompadhi yi li iyali mbyoka twa taalela oshoka oku ulika omudheuli gwopakathimbo, omudhani omukulu gwoManchester United, Darren Fletcher ta popi ngaaka.
Jose Mourinho okwa li a tsuwa iilyaalyaka mEtiyali lyoshiwike sha piti konima yoomvula mbali netata. Manchester United okwa ulika omudhani omukulu Ole Gunnar Solksjaer oye a kale omudheuli gwopokathimbo.
“Manchester united kayi na okukala ponkatu mpaka,” Fletcher ta lombwele oBBC Radio 5 ngaaka.
Oya fa taya ekelehi oshikakomumvo shokatanga kokoompadhi shika naashoka tashi ya, oshoka moku ulika omudheuli omupe, ita kala e na ethimbo lya gwana okukonga aadhani.
Omudhani nguka gwoStoke City, ngoka a sindana oliha iikando itano noManchester United moomvula 12 ndhoka a kala ko, ota ti opwa kala pwaa na elelo lyi li nawa poOld Trafford nkene tuu Sir Alex Ferguson a thigile po oshipundi sh mo2013.
“Ope na eikwatopomutima kutya opwa pumbwa iikamumvo yokatanga kokoompadhi iyali opo ya tungulule,” ta gwedha po ngaaka.
Manchester United oyi li puutihamano moliha, mpoka pe na elala lyiitsa 19 pokati kawo naLiverpool ngoka oye ta tip ii.
Solksjaer, 45, okwa tula mo ookoola 126 sho ta dhanene oManchester United muule wiikakomumvo 11 moka a dhana kohi yaFerguson, a sindana oliha iikando ihamano, omakopi goFA gaali osho wo a tula mo okoola ndjoka ya eta oManchester yi sindane ekopi lyomanyakwa gaEurope mo1999.
Fletcher ta ti ongushu yaadhani yoUnited inayi ya pombanda sho Ferguson a zi ko sho a sindana ekopi lye eti-13 lyoliha mo2013 oshoka mboka ye mu pingene po, David Moyes naLuis Van Gaal naMourinho oya li ya shaina aadhani mpano meendelelo.
“Sho Ferguson a yi aantu oya li ya ti ndjika oyo osipana ya vena oliha naadhani ya suwaka, shika itandi shi itaala, ashike otwa li twa pumbwa shili aadhani yatatu omakondombolo lela ye ye mo, “ ta ti ngaaka.
“Ndjika oya li ompito onene kuMoyes e shi ninge, ashike ine shi ninga – okwa shaina ashike Marouane Fellaini ashike otwa li twa pumbwa natango omudhani gwokonima, omudhani gwomokati e shi kwiinyenga nawa osho wo omudhani gwokomeho- ndyoka olyo lya li etameko lyomaupyakadhi agehe.
Omudhani nguka gwomuScotland ta ti omukuluntuwiliki Ed Woodward okwa yambidhidha aadheuli mbaka niimaliwa,” shoka hasho naana sha li oshinima oshiwanawa monakuyiwa yosipana ndjika noUnited nayi tule po omukalo ngoka tayi pitike ya shaine aadhani yamwe.
Ince okwa li a pula ngele aadhani yamwe yomosipana ndjoka oye na tuu oonkondo dhopamadhiladhilo okukala aadhani yoManchester United, naSavage okwa li a ti aadhani naya itale yoyene konima sho ya ngwangwalithwa koosipana odhindji oshikako shika.
Fletcher ta ti omudhani ngoka a li a kotha ondilo, Paul Pogba omudhani goManchester United ashike ina ihumbata nawa omathimbo ngaka.
Ta gwedha po: “Eikwatopomutima lilwe ooshoka kehe gumwe okwa kala nokupopya kutya ngoka ta ka ya olye – Pogba nenge oMourinho? Omuntu ngu te ya okwa pumbwa okulombwela Pogba kutya nduika kalwa li olugodhi pokati ke naMourinho.”
Ekutho miilonga lyaMourinho olye ya konyala konima yoomvula ndatu sho a li a tidhwa koChelsea.
Ince ta ti ke wete Mournho ta ka dheula we moliha yaEngland nokwa pumbwa okuthuwa po manga.