EENHANA – Eemhangu domulumenhu oo ha kengelele ovakulupe, he liti kutya ye ondudu okwa teelelwa di ka kale ko momafiku 25 Apilili neudo. Mongaha oimaliwa oyo vati ondudu ei ya nyeka ovakulupe oi li poN$327 000 ashike otashi dulika i dulife po opo.
Kennedy Thiogo Kasume, 36, okwa holokele momhangulilo yaMangestalata waEenhana oshivike sha dja ko ta pangulilwa oulingilingi wokutula ovakulupe mokatoo, unene tuu ovo opo va penzelwa. Mongaha ovakulupe ovo va holoka kopolifi tava lopota kutya ova nyekwa oimaliwa yavo ove li vane, ashike otaku fekelwa kutya omulumenhu ou okwa lya oimaliwa ihapu shaashi oha endaenda noshilongo keenhele neenhele, te liti kutya ye ondohotola yopamufyuululwakalo, ile ondudu.
Thiogo vati okwa dalwa komukainhu Omunamibia (Omukwambi) nomulumenhu Omukenya, ashike ohe lihololele ‘ovahakulwa vaye’ onga ndohotola yopamufyuululwakalo ihe fi Omuwambo, noha popi navo momalaka amwe ehe fi Oshiwambo, shaashi vati mboli okushi okupopya omalaka mahapu.
Omulumenhu ou elao ola kanduka po puye oshivike sha dja ko eshi omunhu umwe wokOndangwa a lopotela opolifi kOshitukulwa shaShana kutya okwa tulwa mokatoo, nokunyekwa oimaliwa yomwaalu inau totomonwa kondundu oyo. Olukongo lopolifi ola xulila mEenhana momo Kasume a ka kwatelwa. Ashike nakuninga oshibofa okwa kufa mo oshibofa konima eshi va udafana opo Kasume a fute oimaliwa yaye. Mupya waKasume, manga e li momake opolifi ina efiwa, voo ovakulupe vatatu vomomudingonoko wEenhana otava i kopolifi navo va ka patululila Kasume oibofa, eshi va uda kutya oku li moipandeko.
Ovo va ninga oihakanwa novapatululila Kasume oibofa, ova kwatela mo omukainhu omunamido 53 womodoolopa yaEenhana oo vati moule womido hamano, lwoikando ya yooloka, a kala noku fenda ondjato yaKasume eembongo. Pefimbo opo a ka dimbuluka kutya okwa fa ta tulwa mokatoo Kasume okwa hangwa nale e li nyangusha po oshimaliwa shi fike poN$177 000.
Mukwao omulumenhu omunamido 62, womomukunda Edimba popepi nEenhana, oo a lilwa oshimaliwa shi fike poN$135 000, omanga omutitatu okwa lilwa N$15 000.
Kasume vati oha lombwele “ovahakulwa vaye” kutya ova pumbwa okukoshwa, voo vali ova pumbwa oku andja oimaliwa yavo opo ei koshe yoo i shunifwe nawa mombaanga ngee ya wapalekwa. Ashike okudja opo ihe i shunifa, oha kala ashike ta pula ko oimaliwa ya wedwa po “yepango” ile ya pumbwa vali okukoshwa. Eshi ngeno ovanhu tava ka pula ko oimaliwa yavo, Kasume vati oha kala teva henuka.
Omupopiliko wOpolifi mOshitukulwa shaHangwena Warrant Officer Kaume Itumba okwa ti otashi dulika pe na vali ovanhu vamwe va ninga oihakanwa yaKasume mOhangwena ile keenhele dimwe moshilongo shaashi vati iha kala ponhele imwe, ndele eshi otashi monika ashike ngeenge ovanhu ovo tava i kopolifi opo va ka lopote.