WINDHOEK-Oshigongi shopashigwana shuutekinolohi osho sha pumu ko moshilandopangelo nosha patulula pambelewa Omaandaha goshiwike shika komupevipresidente gwoshilongo omusimanekwa Nangolo Mbumba.
Oshigongi shoka sha hitwa nduno kaanongononi oyendji ya pyokoka muutekinolohi mboka ya gongala nelalakano opo ya kundathane nkene ye na okweeta omalunduluko muutekinolohi.
Mbumba okwa hokolola kutya omimvo dhayi oointaneta oya li yi na ondilo noonkondo adhihe nomakwatathano gawo oga li unene uudhigu.
Noshikwawo, Mbumba ngoka a popi moshileswha she shoka sha leshwa peha lye kominista yi na sha nuuyelele nomakwatathano oshowo uutekilohi Stanley Simataa okwa ti kutya omakwatathano guutekilohi oga yamathana neliko kehe, ekwatathano ndika li na oopelesenda 89.
“Onkene nduno Namibia ita vulu okukala a thigala po ngele tashi ya puutekinolohi. Onkene nduno ngashiingeyi Namibia a tokola opo a tule oshimaliwa momakwatathano goWest Africa Cable System shoka sha kwatakanitha Africa lyuumbugantu naAfrica alihe oshowo Europa,” osho a popi ngaaka.
Okwa hokolola kutya omu na wo Swakopmund Submarine Landing Station ndjoka tayi gandja ompito kointaneta yi na ombiliha notayi endelele nayi noonkondo ngele tashi ya pamakwatathano noshowo posatelite ndjoka unene yi na omakwatathano ge na ondilo.
Okwa ti kutya oshitaasi shoka oshi li ondjodhi onene nehumokomeho kamana okukandula po omashongo ngele tashiya puutekilohi.
“Omakwatathano ngoka haga monika noku eta omalunduluko koonono nkene Aafrika taya longo, taya kwatathana noshowo taya ningi omakwatathano gwokupopya oku pitila muutekinolohi,” osho Mbumba a ti ngaaka okupitila muSimataa.
Okwa ti kutya uutekinolohi mboka ngashingeyi owa kwathela aagundjuka ya kale taya longitha ointaneta mwaayihe mbyoka taya vulu.
Mbumba okwa hokolola kutya ngashingeyi opu na opolohalama ndjoka tayi ithana E-government moka iikondo ayihe yepangelo tayi longitha okukala ya gwanitha po iilonga yawo .
Okwa ti opolohalama ndjoka otayi longithwa pokupingathaneka omauyelele, omakwatathano noshowo okugandja omakwatho nomauyele pokati kepangelo naakwashigwana.
Okwa ti nande opolohalama oyo tuu ndjoka oya pumbwa ngaa okutamununwa nokweendelelithwa ngashingeyi ekwatathano pokati kepangelo naakwashigwana oli li nawa noonkondo.