Victoria Kaapanda
ONGWEDIVA-Ethimbo ndika lyoomwedhi dha hugunina dhokomumvo olyo ethimbo ndyoka aafuthi taya iteyele momagumbo gaantu.
Omugandjimulombo nomugandji gomawuyelele gwopolisi moshitopolwa shaShana Inspekta Thomas Haihambo okwa ti aakwashigwana naya kale ya kotoka oshoka ethimbo ndika lyoomwedhi dhahugunina olyo naana aafuthi haya longo iilonga yawo iiwinayi.
“Omagumbo inaga thigwa we kaage na aakeeleli oshoka, mboka yokuguma iinima kaayi shi yawo oyo ashike ye ku wete kutya megumbo owa za mo noka mu na ngoka e li mo. Oshidhigu ombudhi yi ye megumbo mu na omuntu oshoka otayi tila mo,” Aiyambo ati ngaaka.
Osoondaha ya zi ko oombudhi odha li dha iteyele megumbo lya Inspekta gumwe omukuluntu gwopolisi gwOmondangwa, noya li ya kutha mo oTv onduudhe yuunene wooInch 52, oombiga, omakumbatha, iikutu, oradio, oondjato nayimwe oyindjiyindji, ayihe kumwe oyi na ongushu N$75 000.
Aiyambo okwa ti oshiningwanima osha li sha holoka moshanga shomutenya, molukanda Shinime mOndangwa. Otaku hokololwa kutya aafuthi shoka ya longitha okuya megumbo inashi tseyika.
Opolisi otayi indile moshigwana shi lopote popolisi yopopepi uuna sha mono iinima ya zi nokutumbulwa tayi landithwa momapandaanda.