ONGWEDIVA – Sho okakadhona dhingi moNamibia Nadja Breytenbach taki ilongekidha okuya kethigathano lyokakadhona okawananwa muuyuni koAtlanta sha-USA, oonguwo dhaMiss Namibia ndhoka ta ka zala nando odha pwa okulongekidwa, inadhi nyanyukilwa kAanambia oyendji.
Aanamibia oyendji ina ya nyanyukilwa omuzalo ngoka tagu ka zalwa ku Breytenbach, ngoka anuwa tagu ka ulikwa onga omuzalo gwopashigwana.
Breytenbach ota ka zala ekelanyana lya fa okambilimbili taka tuka, nembale lyi na ooniiga dha fa dhompugulu. Iiyata moka mwa longwa omuzalo ngoka osilka nochiffona, nota shi monika shuukila komizalo dhaaIndonesia. Ashike Aanamibia otaya ti omuzalo ngoka gwa longekidhwa komuhondji Omusouth Africa Mzukisi Mbane, kagu na nande osha tashi kalele po Namibia. “Oshike ina kutha nande ohema yimwe yomuthigululwakalo gwaNamibia?
“Itashi monika nawa nando. Aashiti yoonguwo Aanamibia oya li taya vulu oku eta po oshinima oshiwanawa,” Ndangi Iyambo ta ti.
“Shika osho etompelo Michelle McLean ta ka kala oye Omunamibia gwotango nogwahuguninwa ta sindana epapa lyaMiss Universe. Otu na omizalo odhindji moshilongo muka tadhi fuula. Oshike inaaya dhilaadhila nande omizalo dhOshihimba? Andola ontana yokoWakanda. Natango ope na ethimbo okulundulula omuzalo ngoka opo a ka zale oshikutu shi li hwepo,” osho Ta Ba Na Mandume ngoka a yambidhidhwa kAanamibia ooyakwao a nyoka kepandja lyoNew Era. Daphne Haraes ye okwa ya mo ta ti: “ota monika owala a fa ta kutha ombinga momaulikilo gontumba momapandaanda gomoIndonesia. Ke na nande oshinima shimwe tashi ulike kutya Omunamibia. Tu fatululila kutya oshike shi li komuzalo hoka tashi ulike uuNamibia? Caption: Breytenbach okwi ilongekidhila ethigathano lyaMiss Universe, tali ka ningwa oshikando oshi ti-68 momasiku 08 Desemba 2019.