ǀAEǁGAMS – Otjombindes di ǂgari-aon ge ǀhûǁarebese ǀnanub di ǁnāsa ǂoa ge wekheb tsoatsoas ai gere ǁkhoreǁhare, ǁnāpan ge hoa kurigu !nâb ǁîba go ǂnâsa i ǀHōǂgaeba ūhâ is khao!gâ. Otjombindes ge Omaheke ǀKharib di Otjombinde ǁHûi!nâǂharis !nâ ǁgoe. ǂGari-aon, sao ra !garo!ādi din, Klepaars, Otjijeres, Kaovenis, Okauarongos tsî Zekelaars hâdi din ge ai!â gere ǂoa wekheb Mantaxtsēs tsî Wunstaxtsēs hâra ǁaegub !nâ 80 milimeterga xu 110 milimetergu ǀnōb ǀnanuba ge !khō!oa. Otjombinde ǁhûi!nâǂharis di ǂgiǂgosi ǀawemā-aob Katjanaa Kaurivib ge nēsa !khō!gâ tsî ge mî, ǁîb !garo!ās tsîn aib ge !nona tsēdi ǁaeb !nâ 50 milimetergu ǁgam-e a hōsa. Nē ǀnanub ge Elob xa sîhe hâse, gaxu ǁaeb ǀnanuosib khao!gâ ge hā. “Nē mâsib ge ǂkharirose ǂgari-aoda ge ǀomǂnûi kai. Nausan ǀnî ǂgari-aona nē ǀgaisa ǀnanub !nâ ûitsamaxūna ge ǂoa!nâs ka i, xawe da ge hoatsama ǀnanub hāsa ra !gôa!gâ tsî ǁkhoreǁhare,” tib ge Kauriviba ge mî. !Kharaga !hū-omkhâis ǂansaben tsî ôa!nâdī-aon ge nē mâsib ǀkhurub dib !hūb !nâ hâba, ǁîb hoagu xa kaise ge ǀkhamasa i mâsib ase ǁgauǂui tsî ge mî, ûitsamaxūn ǂgari-aon tsî !hanaǂgari-aon tsîn ge Kuneneb, Zambezib, Kavangob Aiǂoas, Kavangob Huriǂoas, Omusatib, Oshanab, Ohangwenab tsî Oshikotob hâga ǀgaisase tsâǀkhāsa. !Nurigu ra mîsa !oab ge nē ǀkhurub mâsiba ge !aroma 60 000 xa a !nāsa ûitsamaxūn ge !hūb !nâ a ǁōǂoasa. ǀŌ-aisa kampi Ogongo kampes Universitaits Namibiab dis dib, Omusatib !nâ ǁgoes !nâ ge ūǀgarahe hâ i 259 !aub di ǀgurun tsîn ge !âs xa ge ǁō. Afrikab !Khawagas ǀKharisi ǀNanub-tsî-ǂOab mâsiba Kō!haras !Nans (SARCOF) ge nē kurib Aoǁkhumuǁkhâb !nâ aimûǀgaru tsî ge mî, Namibiab SADC !hūgu di ǀgui hîa !gâi ǀnanuba nî !khō!oase ība. SARCOFs di ǀnanu aimûǀgarus ge ǀgam !âkha !nâ a ǀgorasa, ǂgurob hîa ǂNūǁnâiseb, ǀHōǂgaeb tsî Hôasoreb 2019 kōse hâb tsî !gamǁî !âb hîa !Khanni, !Khanǀgôab tsî ǀKhūǁkhâb 2020 kōse nî hâse. Nau hâ SADC !hūgu hîa ǁîgu tsîna nēti ī ǀnanub aimûǀgarudi SARCOFs didi !nâ !khōǂgāsagu ge; Madagascari, Mauritiusi, ǁaegub !âb tsî !khawagas !âb Mozambique dib, Suid Afrikab, Seychelles, Tanzaniab ǀAwas !âb tsî !nāsa !âgu Zambiab tsî Zimbabweb hâkha digu tsîna. Aimûǀgarus !oagu i ge !nāsa !âgu SADC ǀkharib diga ǂNūǁnâiseba xu Hôasoreb nē kurib dib kōse !gâi ǀnanuba nî !khō!oa. Angolab, Botswanab, DRC, eSwatinib, Lesothob tsî Malawib !khawas !âb tsîna.