Victoria Kaapanda
ONGWEDIVA-Nonande iikutu iikulu (ofanditha) mbyoka tayi landithwa momatala gaShakati ya ningi oshihakanwa shoyendji konooli, mboka taya landitha kaye uvite ombili oshoka inaya pewa uuthemba wa gwana okushingitha.
Aashingithi yamwe mboka ya li taya iholeke kutya hayo ooyene yiikutu shoKundana a li a hala okuya moonkundathana nayo, oya ti yo itaya vulu okugandja uuyelele koshifokundaneki oshoka hayo haya ka landa iikutu, yo hayo ooyene yoongeshefa onkene kaye na uuyelele washa. Iikutu iikulu mbyoka ya yalwa pooshako momatala, oya li ya ningilwa engungo kaakwashigwana taya hogolola iikutu yawo mbyoka ya hala esiku ndyoka. Ohayi landithwa okuza N$10 okuya pombanda.
Omushingithi gumwe ngoka inaa hala okupopya edhina lye kuKundana nokwa popi peha lyayakwawo okwa ti yo oye na uumbanda paife, oshoka inaya pewa uuthemba okulanditha iikutu iikulu onkene oshidhigu okupopya nakehe ngoka ta zi hoka pamwe opolisi ye ya okukwata po iinima yawo.
“Tse otatu kondjo naashi tatu vulu opo tu ipaluthe tse yene, oshoka katu na iilonga, ihe paife otatu lombwelwa tu ka futile omashako getu giikutu iikulu tse otse hatu ke yi landa tse yene niimaliwa yetu ihe natango natu fute ishewe epangelo?,” Omushingithi ta nyenyeta.
Ta hokolola ta ti omulandu ngoka gwa tulwa po kepangelo kaye gu uvite nando. Oshike ye na okufutila omashako gawo, yo otaya ka futa natango mpoka taya landithile? Ta pula kutya oshimaliwa shi taya kongo ohaye shi gandja po ishewe nokoolefa okuza koAngola.
Omushingithi gwiikutu iikulu okwa ti oshako ye yiikutu ohe yi landa N$ 2000. Kundana sho a li a yi moonkundathana nokasitoma yedhina Aina Petrus oya ti iikutu iikulu ohayi ya kutha kohi, oshoka okashuta kokongeleka mositola oke na N$ 300, omanga pofanditha te ka landa ashike N$ 20.
Aina ta ti eyooloko ito li mono ngele owa adha e ka zala. Iikutu oyi li monkalo ombwaanawa yo oya yela. Ta ti iihupe mbyoka ta hupitha po ohayi ka gwanitha po natango oompumbwe dhimwe.
Okulanditha iikutu iikulu okuza kiilongo yokondje okwa gandja ompito yiilonga kAanamibia oyendji, mboka ya li yaa na iilonga. Yamwe oya kuta mboka taye ya shingithile, omanga yo taya ka talela yakwawo omashako giikutu yo taya futwa.
Omugandjimulombo gwopolisi moshitopolwa shaShana Thomas Aiyambo okwa ti iikutu iikulu inayi indikwa okulandithwa, ihe oku na omilandu opo gumwe a pewe uuthemba okulanditha okupitila moombelewa dhopolisi.
“Shampa gumwe a pewa epitikilo lyokulanditha, oha pewa natango ethimbo ndyoka e na okulanditha, na ngele lya pu ko, ta ka ningulula ombaapila yokumupitika natango a landithe mpoka haya futu oshimaliwa shontumba,” Aiyambo ta yelitha ngaaka.
Ta ti aakwiilongo mboka haya landitha Omaandaha nEtitano komeho gomatala oya pewa uuthemba kElelo lyondoolopa lyaShakati nohaya futile omahala ngoka.