Omukalimo gwomOngwediva Ext 15 Jona Amunyela okwa ti ye omukwaSwapo okuudha.
“Ondi uvite nayi tandi lundilwa anuwa ondi li koongundu dhoompilamena, ihe kasha shi shoshili, kandi na esiku ndi ze ko kongundu ompangeli,” Amunyela ta ti ngaaka.
Amunyela ta ti, oku li oshilyo shewawa lyaagundjuka yongundu yoSwapo (Swapo Party Youth League-SPYL), ihe ina hala nando edhina lye lyi nyatekwe, ngaashi taye mu lundile ngaaka.
“Ngame omukwaSwapo okuudha. MoSwapo omo nda valelwa, ihe kandi na esiku ndi ze mo, itashi ti ngele ondi na ookuume ye li koongundu dhoompilamena nangame oko ndi li,” Amunyela ta nyenyeta.
Ta ti, omumvo gwa yi natango okwa li a dhengelwa ongodhi konomola kee yi shi, pethimbo ndika lyomahogololo, tayi popi kutya okwa gama komuulikwa kwa li a ithikamena po, ngoka a li a kutha ombinga methigathano momahogololo gopaupresidente, Panduleni Iitula.
Ta popi ta ti, oku uvite nayi oshoka ota lundilwa, ta ti, ye sigo onena oku na okakalata ke koSwapo. Ta pula ta ti, ano sho tashi ulike kutya ye oku li koongundu dhoompilamena oshike tashi ulike?
Amunyela ta ti, omasiku ga zi ko natango okwa dhengelwa ongodhi komulumentu emushi nawa, natango ta popi kutya oku li kongundu yompilamena yedhina “Independent Patriots for Change” (IPC).
“Yakwetu etheni okukwata edhina lyandje nongilishe, oshike aluhe ngele she ya pethimbo lyomahogololo ne otamu tameke okulundilandje kutya kandishi omukwaSwapo, amushe ondimushi omadhina geni,” Amunyela a popi ngaaka.
Ta ti, ye ita kala ookuume ke kokule medhina lyokulundilwa, kehe gumwe oku na ongundu ye ndjoka a landula nokwahokwa, ihe itashi ti, aantu ayehe oya landula mongundu yimwe.
Amunyela ta ti, ihashi kala ethano ewanawa okulundilathana unene papolitika, napu kale pe na esimanekathano.
“Ayihe nda zi noku tumbula ondeyi popi okuyelitha edhina lyandje, omolwa omilombo dha tandelithwa kaatondi yandje, natango otandi shi endulula kutya ngaame omukwaSwapo sigo aluhe,” Amunyela a popi ngaaka.
Monkundathana naKundana Amunyela natango okwa popi ta ti itaka pitika we, omuntu taka nyateka edhina lye.