Omunangeshefa a tseyika nawa monooli Erastus Shapumba “Chicco” okwa ti elalakano lye lyoongeshefa kali shi lyokuhumitha komeho oondoolopa pamukalo gwomatungo, ihe olyo kugandja woo iilonga moshigwana.
Shapumba ndhoka okwe dhi popi esiku lyepatululo pambelewa lyomatungo ge omape mOngwediva ngoka ga patulikile mo 2018. Omatungo ngoka oga longitha oshimaliwa shongushu yoomilliona N$140. “Omalelo goondoolopa naga kale ge na omakwatathano naanangeshefa, opo ya tunge moondoolopa oompe, dhi kale dhi li popepi nomagumbo,” Shapumba ta ti ngaaka.
Ta ti, ongeshefa itayi yi komeho ngele ookasitoma kadhi li popepi noositola oshoka oyo okaasitoma dha kehe siku.
Shapumba oku na oongeshefa miitopolwa ya yooloka, tadhi ithanwa Chicco Group of Company ngaashi kOkahao, Oshakati, Ondangwa, Outapi oshowo mOvenduka.
Shapumba okwa kutu aniilonga ya pita po 500. Ngoloneya gwoshitopolwa shaShana Elia Irimari, poshituthi shepatululo lyomatungo pambelewa gaChicco okwa ti, epangelo lyaNamibia otali tsikile okugandja omahala goongeshefa tadhi yambidhidha meliko lyoshilongo nokugandja iilonga moshigwana.
“Oshiholelwa shika nashi kuthwe ko kaanangeshefa aakwawo, ya tsikile okulonga nuudhiginini, opo wo nayo ya yambidhidhe kekoko lyeliko lyoshilongo, eyambulepo lyoondoolopa oshowo okulwitha ondjala moshigwana,” Irimari a popi ngaaka. Ta ti, okwa itaala kutya ngele iilongo yaAfrica otayi vulu okuya po niilonga oyindji yaantu ya wo, una taya yambidhidha oongeshefa dhawo yene. Omukokoli oshowo omunashipundi gwosikola yoshiputudhilo shombanda International University of Management (IUM) David Namwandi ngoka oye kwa li omupopi gwesiku a simana, okwa fatulula nokutanga Shapumba onga omunangeshefa omwaanawa.
“Shapumba otandi popi kutya omunangeshefa e na ohokwe okutunga oshowo okuyambidhidha eliko lyoshilongo she, oshowo okuyambidhidha nokugandja kwiilonga moshigwana,” Namwandi a popi ngaaka.
Namwandi ta ti, omunangeshefa ngoka okwa li twe mu simaneke noku mu tumbaleka nepapa oshowo nonzapo yuundohotolo oshowo moshikumungu shomangeshefelo, sho twa mono unene neyitulemo lyiilonga ye mongeshefa.