Katima Mulilo
Mapokola ba litulo za linaleli ba Namibia ni Zambia nenze bapatehile mwa mukopano wa mazazi a malalu mwa Katima Mulilo kufumana mukwa sakata wa kusebelisana hamoho sihulu kukulisa museto wa linaha zepeli kutibela likezo za bubangoki za mwahali a museto zecwale kakuzamaisa lino zekola, kuzuma isi kamulao ni bulengwami bwa likomu.
“Kuikambota kwa luna nekutalimwa ze cwale kaze, mukwa wa kukala kusebeza fa litumelelano zaluna za mukopano wa pili, linaneho za kusimulula kusebelisana hamoho, kusebeza kwa kukulisa museto wa makopanelo, kuikabela litaba ni lipatisiso mwa kupazulula miseto isi kamulao, litekisano zekola, kuzuma isi kamulao, bulengwami bwa likomu ni bubangoki mwa malapa, kwa talusa ya etelezi sikwata sa Sipokola sa Namibia la Bulalu biki yefelile, Commissioner Nicolas Endjala, ili yena yomuhulu mwa kalulo ya butikitibi. Sikwata sa Zambia nesietelezwi ki Commissioner wa sipokola kwa Wiko wa naha, Philemon Mutale. Mukopano o neungula la Butanu u simuluhile fa mukopano wa makopanelo wabu 19 wa silelezo ni buiketo mwahali a Namibia ni Zambia kwa Swakopmund kweli yefelile kafo nekulumelelanwi kuli, babeleki babahulu ba sipokola ba linaha zepeli baikopanye kutatulula mukwa wa kusebelisana hamoho.
“Ni fitisa takazo ni buitamo bwa kusebelisana hamoho, kuzwelapili kutiseza swalisano ni chiseho ya kufumana mukwa wa kulwanisa likezo za bubangongi mwahali a museto. Ye kiyona nzila fela yeo kozo, silelezo ni mbombolelwa i konwa kusilelezwa mwa linaha za luna, linaha za mbowela mane ni buse bwa mawate”, kwa talusa mueteleli wa sikiliti sa Zambezi, Lawrence Sampofu nako ya kukwalulo mukopano. Endjala u lumbile katengo kamakopanelo ka Namibia/Zambia mwa mihato ye kangile. “Ni kufitisa buitumelo kwa katengo kaza lingambolo.
Kulumelelanwi kuli, baeteleli ba sipokola ba likiliti, ni sichaba sesimwi mwa sikiliti sa Zambezi ni wiko wa Zambia ite bakopane pili 15 Njimwana isika kwana kale, kutohatisa linaneho za kusebelisana hamoho,” kwa talusa Endjala.