GENEVAS – │Hôakao!naris, !nubusib !norasasib dib ╪hanusi !âb │khāba xu tsî !nubusib !norasa ║hûide ūhâs dib hân ge ║în a !uru !gomsise ge hō╪uihe, ╪oago kurib di │Hō╪gaeba xu nē kurib di !Khan│gôab kōse ge Ukraini !nâ hâ i khâikhâisendi diba. Nēs ge United Nations ge ╪oago wekhe mā╪ui !nurib khoesi ╪hanugu Ukraini !nâ ra !û╪amhes !khaisa ra ║gau╪uib !nâ ge ╪hai.
Nē !nurib !nâ ra mîhes ge ║aupexan 121 khoen, !gōsase khâikhâisenaona a !gamisendi ║aeb !nâ. ║Khātin ge ╪guin âna !gamhes │guisa hî tama i tsî gunihes tsî ╪ūsorohes !nâ ge !kharu.
UNs ra ╪gans ge îdi hoa !nae!khaidi khoesi ╪hanuga !û╪ams dide ôa!gaohe tsî tsūdī-aona ╪an╪uihe tsî │gau ra ║kharaba ║gui-aihe. Beros, United Nations di │Gapi ╪Nû║khaeba-aob Khoesi ╪Hanugu dib disa xu-i ge ║khāti ge !nurihe, Crimeas !nâ-i ge hō╪uihesa khoen ge khoesis âna │hanahe, mî║nâhe, ║nâu!gâs tsî ║kharab ose !khōsis !nâ ū│garahes tsî ╪ū│hapis !gōsase ╪hôare-aon ai ge hâ is, ║nān hîa ge 16 │Khū║khâb dis di xoa║guib Russiaba ║haos diba ╪khâ!nâ tama hâ ina.
“║Nāti ī !kharaga ║nā╪amdi hîa ge ╪hôare-aon ai Maidans di │nopa║nâdi, Crimeas ║nâuguxoa║guib ai!nâ hâ idi, !aroma-i ge sîsen│gauga nî ūhe ║awo║awo nîse nē khoen di ╪hanugu khoesis âna ra ║-khaubagu tsî ║khāti !norasasib ║gâi╪uisens diba ║khauba tsî │omkhâi kais diga,” tib ge nē !nuriba ra │am.
Hoa!nâ-aixaseb nē !nuriba ra mîs ge, “│hôakao!naris ║îb a ║khō║khōsa !gomsise danasa Ukraini !nâ ra │hō╪ui tsî hoa khoesi ╪hanuga ge tsâ│khāsa, nēsi-i ga khoesi, ╪gi╪gosi, sâu║khāsib aib ai, ╪hanusi aib ai tamas ka io hâ-║areb !nâ, kaise kai │guitikō-o!nâsigu, tsî noxopa │nîna.”
Nē !nurib ge ôa!nâde xu ge hā hō╪uidi Mâxō│khā ra Sekretares Xenerali Khoesi ╪Hanugu dib, Ivan Simonovici didi tsî United Nations Khoesi ╪Hanugu Ôa!nâ ra !Nans Ukraini !nâ hâs digu ai a !gao!gaosa. – Nampas/AP