“Kandi wete handi shuna keumbo molwaashi ondi li monghalo idjuu. Paife onda ninga oule womwedi umwe moshipangelo ashike kape na elunduluko. Onda kanifa omukumo kutya onandi ka veluke. Omafimbo amwe ohandi kwatwa komhepo yokulimangeleka – kandi na vali ombili yokomwenyo.”
Aa omatumbulo aElizabeth Joseph weedula 43, omukalimo womomukunda Oipapakane moshitukulwa shaHangwena ta hokolola monghalo omo e li konima eshi a lika keyoka lwoikando ivali.
Joseph okwa kala meembete kEngela okudja omudo wa dja ko ashike paife okwa tuminwa koshingelo kOshakati opo a ka mone etando molwaashi vati oku na edimo la fula.
“Ihandi kofa vali molwaashi ohandi nangala handi vele mokuulu, handi pi. Ohandi kala handi di omainyo molutu,” ta hokolola.
Okwa hokolola ta ti ota hepekwa yoo vali koupyakadi wopamadilaadilo eshi ovanhu tave mu lundile kutya okwa tuminwa eyoka konima eshi vati a ya momilele nomushamane a hombola.
Joseph okwa ti okwa tetwa okuulu nokwooko konima eshi a lika keyoka momudo 2015 shaashi molutu omu na oudio weyoka pefimbo kwa li e li koilonga.
“Onda hangika handi toola eendooxa odo kwa li di li ondumba. Onda uda ashike eshi handi di omaxwilili keenyala mboli onda lika keyoka,” ta ti.
Okwa ti okudja opo ovanailonga vakwao novakwashiwana ova dipaa eyoka olo nokonima ove li xwika po.
Okudja opo okwa kwatwa kounghundi fiyo ta dimo moilonga, nokutetwa oilyo yolutu.
Okwa hokolola ta ti momudo 2021 efimbo loufiku manga e li kokatemba monduda yokunangala okwa lika vali keyoka ashike ola faduka po.
Ta ti okwa twalwa koshipangelo nokutameka ashike olutu laye tali taula.
Joseph okwa ti oku na ounona vane aveshe hava di meumbo tuu omo.