ONDJIVA – Omupedu primaminista Netumbo Nandi-Ndaitwah okwa ti Ovanamibia ve na eehambo doulifilo moAngola itave li ufa koveta yomoshishiindalongo nohava longo ominyonena.
Okwa ti ovanafaalama vamwe ve li moAngola otave li kufile eenhele dedu moAngola okutwala mo oilwifo ngaashi eendjebo noshoyo okudipaa oifitukuti oyo ya a menwa.
Edi Nandi-Ndaitwah edi okwe di popya oshivike sha djako pefimbo a ninga omutumba nambushe moilonga moipambele yoikwapondje Tete Antonio mOndjiva.
Nandi-Ndaitwah okwa li yoo a ninga omutumba novafaalama ve na eehambo moAngola noshoyo oveleli veendodo da yooloka vaNamibia.
Elalakano lomutumba okukaleka po ekwatafano liwa pokati koilongo ei ivali tashi pitile moshikondo shounafaalama noshoyo okukumaida Ovanamibia ve li humbate nawa ngeenge ve li moAngola nokukundafana omashongo a taalelwa kovanafaalama.
Moshipopiwa shaye Minista Nandi-Ndaitwah okwa kumaida ovanahambo ve na oimuna i li moAngola opo ve li umbate nawa noshoyo oku li ufa komilandu da tulwa po kepangelo laAngola.
“Xulifei po okulonga ominyonena moshilongo shovanhu. Kaleni mu na ekwatafano liwa novakwashiwana Ovaangola noshoyo okulongela kumwe mokulwifa oimbuluma kombinga yokeengamba,” ta ti.
Okwa pula ovanahambo ovo ve li kufila eenhele detu moAngola opo ve di fiye po molwashi ove li po vehe na epitikilo.
“Kaleni ta mu ka kongo eembapila dopambelewa ngeenge ta mu i moAngola ile ngeenge ta mu pitifa oinima tai di moAngola.
Nandi-Ndaitwah okwa pandula epangelo laAngola eshi la pitika Ovaanamibia va kale ve na oulifilo moAngola molwashi eshi otashi ulike kutya Namibia naAngola ove na ekwatafano liwa noukumwe.
Onghee okwa ti Namibia ota twikile okukala e na ekwatafano liwa naAngola nokulongela kumwe shaashi osha fimana ngeenge oilongo ina ekwatafano liwa.
Moshipopiwa shaye minista woipambele yokondje yoshilongo waAngola Tete Antonio okwa yelifa ta ti Angola ke na oupyakadi wOvaanamibia tava ningi eehambo ile tava ka lifa moAngola ashike eshi sha fimana oku li ufa komilandu da tulwa po.
Onghee okwa ti Ovaanamibia ova pitikwa okukala va ninga eehambo moAngola molwashi ounamapya ova fimana mokuhambula po eliko loshilongo nokulwifa ondjala noluhepo.
Okwa kumaida Ovaamibia opo va kale ve na ekwatafano liwa novaleli vaAngola tava wilike peenhele opo pe na eehambo davo.
Lwopokati opo, Daniel Mbangula moshipopiwa shaye a popya ponhele yovanafaalama vakwao ve li moAngola okwa pula epangelo laAngola opo li kale ta ningi omapekapeko omalinyengo oimuna kombinga yokeengamba molwashi ova taalela eshongo linene loimuna tai vakwa okudja moAngola noshoyo okudja moNamibia.
Okwa ti omunahambo keshe e li moAngola ndele ite li umbata nawa na ka tukilwe onghatu yopaveta molwashi itashi ulike efano lii kOvanamibia vakwao ve li moAngola.
Mbangula okwa pula minista Nandi-Ndaitwah noshoyo minista Antonio opo va pitike ovanafaalama pokati koilongo ei ivali va kale tava ningi omangeshefelo oimuna.