OMPUNDJA – Oondima odha tameka, netemo olya yi miilonga miitopolwa yomonooli, konima Shiyenga shaNangombe a kala noku ga dhenga pevi nawa okuza iiwike ya zi ko.
Mehuliloshiwike, Kundana okwa li a talele po aanafaalama yomomapya moshitopolwa shaShana oshowo moshitopolwa shaMusati, moka ogendji ga ziza nawa ge na iilya. Ashike, aanafaalama yamwe opo taya tameke okukuna konima omvula ya loko mehuliloshiwike.
Ndapewa Amupolo gwomomukunda Omusimboti, okwa ti omasiku gokulala oga pwa ko, paife ethimbo lyokulonga.
”Ngame naanegumbo lyandje ohatu penduka po05h00 yongula, tatu umbu etemo, tse tatu zimbuka po11h00 gwongula,” ta ti ngaaka.
Amupolo ta ti, ethimbo ndika olyo lyokulonga, itaya tegelele omvula yi loke sha pitilila, oshoka oya tila omapya ga yule.
“Otatu pandula, oshoka iilya yetu inayi sa komutenya yo inayi kukuta. Omvula ohayi loko okukoleka iilya yetu. Omukumo out gu na natango, kutya out na okulokwa, oku na ethimbo natango,” Amupolo ta hokolola ngaaka.
Ta ti, ombepo otayi pepe nawa, oya inekela kutya momasiku ga landulako, omvula oyi na okuloka nawa.
Kundana sho a li a talele po omikunda dhimwe moshitopolwa shaMusati ongula yOlyomakaya aanafaalama oyendji oya li ya piti ye li momapya, yamwe otaya limi, yo yamwe otaya kunu omanga yamwe opo taya pulula.
Selma Iiyambo gwomomukunda Ehafo lyaKandenge, omimvo dha piti oya kala ya taalela ondjala omolwomuloka itaagu loko nawa.
“Omumvo gwa zi ko ethimbo ndika evi okwa li lya kukuta, kakwa li nda pulula oshoka okwanli nda tila okuhepitha oshimaliwa shandje,” ta popi ngaaka.
Ta gwedha po ta ti, epya lye olya opala nawa iilya, ta ti nuumvo ondjala kaye yi shi nando.
vkaapanda@nepc.com.na
Samuel Nathanael gwomomukunda Okando okwa ti, ina pulula natango epya lye, oshoka omvula ndjoka ya ningi esiku tayi loko ka kwali ye mweetitha oonkondo dho kulonga, ashike yomasiku ngaaka oya tokola.
“Otandi tameke okulonga epya lyandje paife. Ethimbo ndika oku za paife oshoka omvula opo hayi loko nawa, niilya ohayi koko tayi endelele,” Nathanael ta popi ngaaka.
Ta ti, sigo oompaka ota pandula, omwiidhi ogwa mena nawa, iimuna oya paluka nawa komalutu.