Omukainhu weedula 52 womomukunda Omutwewoshimbungu oku li koshitaashi shopolifi meameno lovapolifi shaashi vati ta ningilwa omatilifo edipao, okudengwa nomatilifo okuxwika po eumbo laye molwaashi vati ta li ovanhu momukunda wavo.
Omukulunhu koshikondo shokukonakona oimbuluma wopolifi yomoshitukulwa shaHangwena, omupedu Commissioner Zachariah Amakali okwa koleka ta ti omukainhu okwa pumbwa eameno lopolifi shaashi ota ningilwa omatilifo kovakwashiwana.
Onghee naashi osha eta opo a twalwe koshitaashi shopolifi shopOhangwena.
Omukunda Omutwewoshimbungu ou li moshitukulwa shaHangwena.
Ovakwashiwana vomomukunda Omutwewoshimbungu ova ninga omunyano wopambili tava pula elelo lopamufyuululwakalo laUkwanyama li kufe mo omukainhu momukunda wavo shaashi vati ta li ovanhu.
Oshiwana osha ninga omunyano oshivike sha dja ko peumbo lomukainhu oo ta fekelelwa oulodi.
Ovakalimo vomomukunda ou ova hokolola tava ti ngeenge omukainhu oo ina tewa mo momukunda otava twikile nokuninga ominyanyo noshoyo okuxwika po eumbo laye.
Omukwashiwana umwe okwa hokolola ta ti okudja momudo 2021 momukunda Omutwewoshimbungu omwa fya ovanhu va hamano taku fekelwa kutya vati ova liwa komukainhu oo.
“Otwa loloka omukainhu ou.
Na dje mo momukunda wetu shaashi ota hepeke ovanhu,” ta ti. Eshi a kwatafana naKundana omupopiliko welelo laUkwanyama Andrew Naikaku okwa ti ovakwashiwana ova puka shaashi kape na omunhu e na oufemba wokuningila mukwao omatilifo.
Naikaku okwa ti elelo laUkwanyama ihali pangula oinima ya nyika oulodi.
Onghee okwa kumaida oshiwana opo shi kale tashi lopotele opolifi ngeenge tashi lundililwa oinima ya nyika oulodi.
“Elelo kali na oufemba wokutataa omunhu momukunda shaashi vati ta li ovanhu.
Opolifi oyo hai ungaunga noinima ya nyika oulodi,” ta ti.
Okwa kumaida oshiwana opo shi xulife po okulundila ovanhu moinima youlodi vehe na oushili muyo shaashi kashi li mondjila ngeenge omunhu ta lundilwa.
“Omunhu ngeenge ta lundililwa oulodi iha kala vali a manguluka ngeenge e li mokati kovanhu shaashi vati omulodi,” ta ti.
fhamalwa@nepc.com.na