ONGWEDIVA – Ngoloneya mupe woshitukulwa shaHangwena Sebastian Ndeitunga okwa ti okwa pandula nokuudite etumba eshi a ulikw a ninge ngoloneya waHangwena.
“Onda hafa unene. Ondi na elao shaashi ka shipu okuhoololwa komupresidente u ninge ngoloneya,” ta ti.
Presidente Hage Geingob okwa kufa moilonga ngoloneya woshitukulwa shaHangwena Walde Ndevashiya noku mu pingena po nakakukutu komatanga wopolifi mukulu Sebastian Haitota Ndeitunga.
Omupopiliko mombelewa yomupresidente Alfredo Hengari okwa koleka uliko eli.
Hengari okwa ti omupresidente oku na eenghono noufemba wokulundulula ovaleli ovo ve li koshi yombelewa yaye.
“Omupresidente ote liufa komilandu de likwatelela kekotamhango laNamibia,” ta ti.
Momukanda woikundaneki wa dja kombelewa yomupresidente, okwa ti ngoloneya okwa teelelwa opo a kale ta wanifa po oshilonga shaye moshitukulwa nokukwashipaleka kutya eepoloyeka oda tulwa moilonga.
Geingob okwa ti oku na omukumo kutya ngoloneya mupe Ndeitunga ota ka wanifa po oshilonga shaye.
Okwa pandula ngoloneya mukulu Ndevashiya eshi a kala e kwetele oshitukulwa shaHangwena komesho.
Lwopokati opo, Ndeitunga okwa ti ota ka longela kumwe noshiwana mOhangwena noshoyo okutula moilonga eepoloyeka da yooloka.