Omukulupe omunamido 78 okwa hokolola kutya ota li ta pi momukunda wavo shaashi vati ta kufwa edu laye.
Letisia Wombulu womomukunda Omahalya, moshitukulwa shaMusati okwa ti okwa li e na eenhele da fika punhatu momikunda da yooloka moshokandjohoololo shaAnamulenge, ndele mbali adishe okwe di kufwa koovene vomikunda, yoo imwe natango oku li mo ashike ombinga imwe, omanga ombinga imwe nayo vati e i kufwa.
Ta hokolola kutya mbali domeenhele daye eshi edi kufwa oda landifwa po ashike ngahenya kumwene womukunda, ashike ina pewa nande oyo ofilinga.
“Ngaashi onhele yange yotete oya li kOikale mOmbalanhu, oko kwa li ndi na onhele yange yakula yomalandifilo. Onda ka papala ashike eshi muni ta te po ovanhu aveshe ava va li ve na po eenduda domangeshefelo ndele aveshe te va futu mo, ashike ame nofilinga oyo ngaho inandi mona peke lange apa,” ta tumbula.
Okwa twikila kutya edu laye lokOkapuku nalo natango okwe li kufwa ndele tali yandjwa po kuvamwe alishe, noina mona ko nande ofilinga. Vati okwa pula mwene womukunda kutya omolwashike e na okuyandja po edu laye, ashike okwa nyamukulwa kutya oku na onhele yakula, yoo inai fendelwa.
“Onde mu pula kutya onhele ngeenge oya ninga eedula inai fendelwa otai fendelwa ingapi? Fiyo opapa inava nyamukula nge kutya onhele ohandi i fendele oimaliwa i fike peni ashike natango otashi ehama nge,” Wombulu ta ti.
Paulus Mundjele umwe womoovene vomukunda okwa hokolola kutya yee ina landifa onhele yaWombulu.
“Ame apa nda yandja ope li kokule nonhele yaye, pa pita nokuli noshitauwa. Ondi li mwene womukunda ashike kandi na oufemba wokuyandja onhele komunhu i na mwene nale,” Mundjele ta tumbula.