OSHAKATI-Nonando oshigwana sha kala noku kumagindhwa shi taambeko aayaluli yaantu nomagumbo moshilongo ngoka ge li metifa, otaya nana nondatu.
Aayaluli yamwe mboka ya li ya yi moonkundathana noshifokundaneki shika oya ti, otaya longo taya pi, okelago ashike ngele ya ya kulwa nawa.
Omupresidente gwoshilongo Hage Geingob omanga omayalulo inaaga tameka okwa li a kumagidha oshigwana shi kuthe ombinga momayalulo gaantu nomagumbo.
Geingob okwa li a kumagidha , oshigwana shi taambeko aanambelewa mboka, sho taya talelepo omagumbo gawo oshowo okugandja uuyelele awuhe tau pulwa.
“Omayalulo gaantu nomagumbo oga simana, oshoka ohaga ka longwithwa okuthaneka elongekindho lyonakuyiwa, sha ikolela ko mwaalu gwaantu moshilongo, opo kehe gumwe a kale a kwatelwa mo,’’ ta fatulula ngaaka.
Omayalulo gaantu nomagumbo oga li ga tameke momasiku 18 gaSepetemba notaga ka hula momasiku 03 gaNovomba nuumvo.
Ndinelago Petrus gomOshakati okwa ti, momagumbo gamwe ohaya tindhwa mo omanga inaaya pita nolugumbo.
“Kashi shi oshipu, thimbo limwe owu uvite aantu taya popi, ihe no nonando wu kunde, to pula wu egululwe, ito yamukulwa nando,” ta popi ngaaka.
Ta ti, oku wete ashike omasiku itaaga pu ko, oshoka otaya mono iihuna.
Titus Shikalepo okwa ti, omatukano ihaye ga yalula we, paife oye shi taambako, nonando ohaya kala yuuvite nayi.
“Ihatu longo we twa manguluka oshoka ohatu kala twa mbandala. Shoka katuna nkene tushi ninge oshoka otuna okugwanithapo iilonga yetu,” ta popi ngaaka.
Gumwe okwa ti, ohaya mono ashike omathano gawo taga taambathanwa komalungula, ihe ihaya mono ethimbo taya thanekwa.
Ta popi ta ti, yamwe ohaya ya mukula kutya yo kayena iilonga, onkene itaya ya yalulwa.
“Okwana kwiilonga oko ngaa taku nyenyetwa, kandishi ngele oshigwana oshuuvithwa ko ngaa etompelo nesimano lyomayalulo,” ta popi ngaaka.
Ngoloneya gwoshitopolwa shaShana Elia Irimari okwa li indile aakalalimo yomoshitopolwa shaShana ya longele kumwe naayaluli, omolwa omauwanawa go monakuyiwa.
“Shoka sha halika omwaalu gwaantu, opo ku longekindhwe onakuyiwa ya opalela omwaalu gwaantu ayehe ye li moshilongo,” ta fatulula ngaaka.
Opolisi moshitopolwa shaShana oshiwike sha ziko oya lopota omuniilonga gomayalulo a li a ponokelwa kaalumentu yatano noku mu kutha iilongitho ye, momundhingoloko gwOmpumbu.
Otaku hokololwa kutya naku ponokelwa okwa li ta longo uusiku lwopotundi 21h00, ihe ka pwa li pena egameno lyopolisi.
Okupitila miikundaneki ya yooloka, omuyalulindjayi Alex Shimuafeni, okwa li a popi kutya oya lopotelwa oshiningwanima shoka sha holoka moshitopolwa shaShana, ihe omulumentu ngoka ka kwa li a lopotele omukuluntu gwe kutya otaka tsikila okulonga uusiku.
“Otu li mekwatathano nopolisi yaNamibia, opo aayaluli ya kale ya gamenwa,” ta popi ngaaka
Oshifokundaneki sho The Namibian, oshiwike sha ziko osha shanga kutya Ottilie Mwazi, ngoka oye omupevikuluntuyaluli gwoNational Statistic Agency (NTA) okwa popi ta ti, aanambelewa yomayalulo oya pewa uuthemba wokupula uuyelele megumbo kehe.
“Aanambelewa mboka yomayalulo otaya vulu okugandja omageelo kwaamboka itaaya iyutha unene tuu mboka taya tindi okuya pa uuyelele nenge taya tindi oku ya pitikila momahala nenge momagumbo gawo. Omageelo taga gandjwa ongaashi egeelo lyofuto yooN$50 000, egeelo lyoomvula ntano mondholongo nenge ya pewe omageelo ngoka gaali oshita.” The Namibian a shanga ngaaka.
Ta tsikile kutya, omunashipundi gwewilikongundu lyoNSA, Salomo Hei okwa popi kutya oshikondo shoNSA otashi tsikile nokukala shi itula mo mokushilipaleka kutya oshilongo oshi na uuyelele wu li mondjila, wopethimbo nowuna ongushu.- vkaapanda@nepc.com.na