Ehangano lyokugamena iinamwenyo lyedhina Society for the Prevention of Cruelty to Animals (SPCA) olya kumagidha oshigwana shi kale hashi kola oombwa dhi dhi shi okutekulwa.
SPCA okwa ti oombwa dha tekulwa nawa nodha pewa okulya nawa ihadhi kala oohahu, dho ohadhi tameke ashike olugodhi uuna pe ya uupyakadhi nenge dha sagelwa.
Ehangano ndyoka okwa li lya popi ngaaka okupitila komalungula sho kwa li lya holola euvonayi, konima omulumentu gwomimvo 44, a si sho kwa li a lika koombwa Osoondaha. Oombwa odho tuu ndhika ohela odha ponokele wo nokumonitha oshiponga omukeleli gwomaliko omutiyali. Elago enene ina ehama unene. Shika osha etitha opolisi opo yi dhipage oombwa ndhoka.
Omupopiliko gwopolisi moshitopolwa shaShana Thomas Aiyambo okwa ti oshiningwanima shoka osha holoka mOshakati, konima yomatungo gaChico poPanama Tiles and Paint Wholesale.
“Omulumentu ngoka omuniilonga gwehangano Rubicon Security okwa li ta zi kiilongo ongula, lwopotundi 06h00, sho kwa li a ponokelwa koombwa dhi li ntano dhoka tadhi ithanwa Rottweiler,” ta popi ngaaka.
Ta ti oombwa ndhoka dha talika ko onga dha nika oshiponga, odha li dha pitile moombululu dhondhalate nokuponekela omulumentu ngoka kwa li ta ende.
Aiyambo ta ti, omulumentu ngoka okwa tseyika nedhina Ruben Abraham okwa li a adhika e li owala, iikutu ye ayihe oya li ya tuulwa po koombwa.
“Okwa li a falwa koshipangelo mbala, ashike okwa li e li monkalo ombwiinayi, nokonina yethimbo efupi lya piti po, Abraham okwa li a hulitha,” ta hokolola ngaaka.
Oombwa ndhoka odhomukulukadhi gOmuchiina, ngoka inaa mangw apo natango, nonando a patulilwa oshipotha.
Omakonakono gopolisi oge li metifa.
Opolisi oya kumagidha oshigwana shi kale sha kotokela oombwa ndhoka dha nika oshiponga mokati kaantu.
Tayi ti oombwa odha nika oshiponga onkene odha pumbwa egameno opo kaadhi monithe aantu iiponga yaa na oondjo.
Okupitila miikundaneki ya yooloka oshigwana osha kala nokulondodhwa komalelo goondolopa opo shi kale sha patela mo oombwa dhawo moohofa okuyanda omaupyakandhi ngaashi ngoka.
vkaapanda@nepc.com.na