ONGWEDIVA-Ongudu yovahongwa Ovanamibia tave li hongele ounamiti vati otai mono oixuna moCuba molwa omalongekido eedila dokuva tuta ko taa shongola.
Otaku hokololwa ongudu yovahongwa va tuminwe kepangelo mo2016 opo ike li hongele oundohotola wopaunamidi ya mana elihongo layo ashike paife ove li shike moCuba tava elaela, kave na oikulya nomalukalwa, vo vali kave na outekete vodila ngeno va alukile keumbo.
Vamwe vomovanafikola ava, ova hokola kutya ova djala omanguwo koCuba eemwedi mbali da pita, ashike eedila edi ta didi koNamibia hadii koCuba vati ohadi kala diyadi.
“Fimbo limwe odila nghee taiya moCuba oi ashike oipundi ivatano yovanafikola, omanga tuli o170,” umwe womovanafikola tati.
Ndalinoshisho Sakaria omukwashiwa umwe ena omupambele eli mongudu yovanafikola, okwa hokolola kutya yee okwa lulilwa koshiningwanima eshi shaashi ovanafikola otava monene oixuna koCuba.
“Eshi veli nghaho efimbo loku kala momaumbo aakwali va pewa kepengelo ola pwa ko otamu ya ovanafikola vape . Outekete vavo vokulya kekulo navo ova pwa ko shaashi efimbo lokushuna koNamibia ola fika. Fye otwa limbililwa shaashi ngeenge eenhele omu hava di ova tewa mo kave na apa tava yuka,” Scaria ta hokolola. Okwa twikila yoo kutya Cuba vati oshilongo shimwe shi na ondilo yamatutu. Nande vati ova tume oimaliwa yaNamibia yafa ihapu eshi tai ka shendjwa meePeso daCuba ohai kala inini neenghono.
“Oimaliwa ei hatu va tumine nafye katu ina, ohatu i kongo noudjuu. Onghee otwa lulilwa notwahala omalongekido ofaafafa a tulwe moilonga opo tu dule okuya komesho,” Sakaria ta yelifa.
Okwa weda po yoo kutya ovahongwa ava vati ohava pewa shito okafilinga kepangelo keshe omwedi, ashike omwedi ou inava pewa, netomeno ka li shiivike fiyo opapa.
Omupopiliko wouministeli wouhaku Walters Kamaya okwa ti ouministeli owa ninga omalongekido okufuta outekekete pefimbo, ashike ehangano lomatukodila olo tali ende kashona. Kamaya ina yandja ouyelele kombinga yehangano olo tali yandje olefa kovalihongi.
“Oministeli oya shiivifilwa kombinga yoshiningwanima eshi, noyeli paka mo moku endelelifa oshiningwanima eshi opo ovanafikola va tameke okuuya momwaalu muhapu,” Kamaya ta tumbula.
Okwa kundenekwa yoo kutya omwaalu paife owafa ngaho otau nde taushuna pedu, novanafikola ava ovali ko veli po 170 paife vati okwa xupa veli 110.