OSHAKATI-Omupresidente gwoshilongo Hage Geingob okwa kumagidha oshigwana shi kuthe ombinga momayalulo gaantu nomagumbo ngoka taga ka kala ko okuza momasiku 18 gaSepetemba sigo 03 gaNovomba nuumvo. Geingob okwa ti, oshigwana nashi taambeko aananbelewa mboka taya ka kutha ningi omayalulo, sho taya ka thika pomagumbo gawo oshowo okugandja uuyelee awuhe tau ka pulwa.
“Omayalulo gaantu nomagumbo oga simana, oshoka ohaga ka longwithwa okuthaneka elongekindho lyonakuyiwa, sha ikolela ko mwaalu gwaantu moshilongo, opo kehe gumwe a kale a kwatelwa mo,’’ ta fatulula ngaaka.
Kehe ngoka anuwa taka penduka moNamibia okuza Omaandaha otaka yalilwa mo mayalulo moka.
Naakwiilongo mboka taya ka aadhika moshilongo, otaya ka yalulilwa mo mwaalu, oshoka opena mboka yena omagumbo moNamibia. “Otandi indile elongelo kumwe, opo omayalulo ngoka ga tameke nawa sigo taga hulu pwaana omayipumo mumwe,” Geingob ta indile ngaaka.
Omukuluntu gwehangano lyoNamibia Statistic Agency (NSI) ndyoka lyi na oshinakugwanithwa shokuyalula aantu moshilongo Alex Shimuafeni okwa ti ehangano lyomayalulo olya ilongekidha nawa okutameka iilonga yawo.
“Omayalulo oga li ga ningi omimvo mbali taga undulilwa komeho, omolwomayimbo goshimaliwa. Nuumvo aantu yathika po13 000 oya kutwa okugwanitha po iilonga mbyoka oshilongo ashihe,” ta popi ngaaka.
Ta ti, omayalulo ngoka ohaga ningwa kehe konima yomimvo 10. Okwa totha mo wo kutya metengeneko lyo2023/2024 oomilliona dhi li N$706 otadhi ka longithwa momayalulo moka. Ta fatulula kutya omayalulo goshigwana nogomagumbo oga pumbiwa opo kumonike kutya moNamibia omu na aantu oye thike peni, omagumbo oge thike peni, oshigwana ohashi hupu ngiini na oshike sha pumbiwa shi longwe po.
“Shika ohashi ningilwa opo epangelo li vule okutula iinima yalyo pomahala nokushiwa kutya oshike nashike, shi na okuningilwa oshigwana noshi thike peni? pomahala gi ili nogi ili ga yooloka,” Shimuafeni ta ti ngaaka.
Ta ti, omayalulo ngoka oga simana noonkondo nakehe gumwe ota indilwa a ka kale a longela kumwe naayaluli momasiku ngoka gomayalulo, taga ka ningwa miiwike yi li itatu.
Ta gwedhapo kutya kakele komayalulo gaantu, omagumbo otaga ka yalulwa, naantu mboka taya kaadhika mo otaa ka pulwa wo omapulo gi ili nogi ili ngaashi ga longekidhwa kepangelo, ano ko komissi yomathaneko gonkalo yoshilongo.
“Omanga ethimbo ndyoka inaali thikana,momasiku ngaaka ga hupu ko aanambelewa yomayalulo goshigwana, otaya ka kala taya ende niitopolwa ayihe yaNamibia, taya tseyithile oshigwana kutya otaku ka ningwa omayalulo goshigwana omanene nogakwata miiti nuumvo na nkene taga ka enda,” ta yelitha ngaaka.
Oshigwana shaNamibia otashi indilwa shi kale shi ilongekidhila nawa omayalulo ngaka gaantu nomagumbo gawo kumwe. vkaapanda@nepc.com.na