ONGWEDIVA -Omukulupe gwomimvo 65 anuwa okwa kwatwa koonkondo komulumentu ngoka taku hokololwa kutya oku na uunkundi wopamadhiladhilo.
Sha ikolelela kolopota yiiningwanima hayi holoka mehuliloshiwike, oshiningwanima shoka osha holoka momukunda Oshikwiyu, momudhingoloko gwOmungwelume moshitopolwa shaHangwena Olyomakaya.
Otaku hokololwa kutya, omukulupe ngoka okwa li ta ende ta zi kuukamba, lopotundi 19h00.
Okwa li anuwa a ponokelwa, e ta hatwa po nokukwatwa koonkondo.
Opolisi inayi yelitha ngele omulumentu ngoka okwa mangwa po.
Moshiningwanima shimwe inaashi faathana, opolisi moshitopolwa shaKhomas oyi li molukongo lwaalumentu mboka ya li taya kambadhala okukwata okakadhona komimvo 16 ombambyona.
Sha ikwatelela kepeko lyopolisi, okanona hoka oka li ka ningi okanelago sho kwa li ka sindi nakumukwata e taka fadhuka po.
Otaku hokololwa kutya oshiningwanima shoka osha holoka momudhingoloko gwoHochland Park moWindhoek.
Okakadhona hoka anuwa okwa li ka kwatwa okuza konima, oshowo komulungu opo kaaka kuge kaalumentu mboka inaaka mona kiipala.
Anuwa okwa li ka umbilwa mokapolo okambulau, moka a li a ende ataalelithwa mevi opo kaa ka mone mpoka ta falwa.
Konima sho anuwa aalumentu mboka ya tula, okwa li ya etha okanona ka kale kuko yene omanga ke li mohauto nagumwe, mpoka ka li ka monene ompito yokufadhuka po.
Okanona hoka oka li ke shi pondola okuthika kegumbo, inaaka longelwa omiyonena dha gwedhwa po.
vkaapanda@nepc.com.na