ONGWEDIVA – Ouministeli weemina noikwanghondo owa holola kutya ondado yomahooli omwedi Sepetemba otai ka londa.
Ouyelele wa dja kouministeli owa hokolola kutya omahooli opetolola otaa ka londa neesenda 120 koliteela imwe, omanga omahooli odiisela taa ka londa neesenda 170 koliitela.
Omahooli moWalvis Bay, opetolola otaa ka kala poN$20.98 omanga o diisela 50 ppm taa ka kala poN$20.75 koliteetela. Odiisela 10 ppm N$20.95 koliitela.
Ouyelele owa tofa mo yoo kutya okudilila komivalu da dja koministeli ondado yomahooli inaa dindwa muAguste aushe okwa li e li pee USD 110.507 kondoloma, okuyelekanifa naJuli omo ondoloma ya li po USD 102.231 kondoloma. Ondado oya hapupala nee USD8 kondoloma.
Ondado yodiisela 50ppm muAguste oya li po USD118.128 kondoloma okuyelekanifa naJuli omo ondoloma ya li i na ee USD100.231. Eshi tashi ulike kutya ondado yomahooli oya londa no USD18 kondoloma.
Natango omahooli odiisela 10pmm mu Aguste okwa li po USD119.249 kondoloma omanga mu Juli okwa li po USD101.712 kondoloma. Eshi vati otashi ulike nghee ondado yomahooli ya londa moule weemwedi mbali da pita.
Ouyelele owa ti yoo kutya okudja mu 01-29 Aguste 2023 odola yaNamibia oya li ya wa pedu okuyelekanifa no-USD. Odola yaNamibia oya wa pedu neepelesenda 3.7.