Ovakainhu kewalanda laNandjokwe itava ka telekela vali momutenya molwaashi paife otava tungilwa etala lomudile.
Edi oda popiwa komukulunhuwiliki wouhaku moshitukulwa shaShikoto Joshua Nghipangelwa, a hokolola ta ti etala ola tamekwa nale okutungwa notali ka pwa momafiku ashona.
Okwa ti etala otali tungwa kongushu yoshimaliwa shi dulife N$200 000. Okwa didilikwa ovakainhu kewalanda hava mono oixuna kwa li ngeenge tava teleke oikulya yavo shaashi ohava kala ashike ve li momutenya omanga pefimbo lodula ihava dulu okuteleka molwaashi ponhele opo ohapa talama omeva.
Ewalanda onhele oyo hai kala ovakainhu ve li momateelelo hava ka teelela ngeenge ve li popepi nokupuluma. Ewalanda ohali kwafele unene ovakainhu hava di komikunda dokokule shaashi ngeenge tava fetwa ihava ende vali oshinano shile molwaashi ola tungwa li li popepi noshipangelo. Neudo ewalanda ola longululwa noundjuo noulikoshelo navo ova longululwa konima eshi ovakainhu kwa li hava lyata omeva onyata taa kunguluka okudja moundjuo.
Ewalanda okwa li yoo vali lay ambididwa nomatalashe noikumbafa komupedupresidente Nangolo Mbumba. Nghipangelwa okwa ti ombelewa yaye otai twikile nokuyambidida ovakainhu kewalanda ashike omhumbwe yoshimaliwa inashi wana osho unene tashi imbi kewalanda ku kale oipumbiwa ya wana. Okwa indila moshiwana kwaau e na ehalo lokuyambidida ovakainhu ve li kewalanda opo oshiwana shi kwatafane nombelewa yaye.
fhamalwa@nepc.com.na