Omauliko giipindi gondoolopa yEenhana moshitopolwa shaHangwena oga tameke Omaandaha mehala tali ithanwa e Convention Centre.
Aakuthimbinga oya li ya tameke omangeshefelo gawo nenyanyu moshiindingili shoka tashi ka hula momasiku gatano gomwedhi nguka.
Nuumvo, omauliko giipindi ngoka otaga tyapulwa kohi yoshipalanyolo ‘okugalulila eliko lyoshimaliwa moshilongo okupitila momauliko giipindi.
Esiku ndyoka lyotango okwa li lya hili oyendji okuza kiitopolwa yi ili noyi ili, nelalakano lyokunyanyukilwa pamwe oshowo okuyambidhidhathana.
Omauliko gahugunina mEenhana oga li ga ningwa mo2019, noga li ga gandja ompito kaauliki yiipindi kaantu ye vule po100, mwa kwatelwa aakwiilongo.
Omupopiliko gondoolopa yEenhana Paulus Shilongo okwa ti elalakano, okugalula eliko lyoshimaliwa, ndyoka lya gu pevi oshowo okugalula oongeshefa ndhoka dha shuna monima.
Ta ti, omawuliko giipindi mEenhana, ompito ombwaanawa kaanangeshefa oshowo komahangano ga yooloka, okuulika uunongo niilonga oshowo okushingitha iilandandithomwa yawo.
Omawuliko giipindi mEenhana oga ningwa iikando, yi li 13 ngaashingeyi.
“Iipindi mbyoka ohayi gongaleke aanangeshefa oshowo aantu ya za kokule, taya ulikilathana uunongo niilonga yawo mehala limwe,” ta popi ngaaka.
Shilongo okwa ti nuumvo oya gongaleka aawuliki yiipindi oyendji lela okuza koombinga noombinga.
Ta ti, elalakano okugandja ompito kaanangeshefa oshowo komahangano gu ulike iishingithomwa yawo oshowo okugalulila eliko mondoolopa yEenhana.
“Omauliko giipindi oge na iilandithomwa ayihe okuza kiikulya, kiizalomwa nakehe shoka hashi vulu okweetwa po noonyala oshowo okweeta oombelewa hadhi gandja omayakulo ga pumba popepi.
Shilongo okwa ti, omawuliko giipindi gonuumvo oga yooloka komakwawo, oshoka oga longekidhwa naayihe yi na okukala mo.
Johannes Johannes ngoka e na okatala momauliko giipindi okwa ti esiku lyotango netiyali oga enda nawa lela.
“Otatu pandula oshoka otwa landitha nawa, otwa hala omaliko ngoka ga hupa ko ga fe ngoka gotango,” ta pandula ngaaka.–vkaapanda@nepc.com.na