Ounona va ninga oihakanwa yokukwatwa onghonga kovapambele vavo
Ovanyeumbo onghee tava twikile nokulongela ounona wavo voukadona ominyonena dopaixulo omo vati okakadona keedula 16 ka kwatwa onghonga kuxe weedula 51.
Oshiningwanima osha ningilwa Omaandaxa momukunda Eendombe moshikandjohoololo Ogongo, moshitukulwa shaMusati. Omukulunhu wopolifi moshitukulwa shaMusati, Komufala Ismael Basson okwa hokolola ta ti omufekelwa okwa ufana omona monduda yaye yokunangala noku mu kwatwa onghonga. Omufekelwa okwa kwatwa po nota holoka momhangu nena, ota pangulilwa oshibofa shekwatonghonga. Oshiningwanima shikwao, okaana keedula hamano oka kwatwa onghonga komumwainamati meumbo lavo.
Oshiningwanima osha ningwa momafiku 23 omwedi ou komukunda Omalyadhila moshitukulwa shaMusati. Omufekelwa weedula 22 okwa kwatwa po nokwa holoka momhangu onghela.
Ovakainhu otava kumaidwa opo vaha fiye vali ounona voukadona momaumbo novalumenhu molwashi ovalumenhu vopaife ohava kwatwa komhepo yoku ya moixulo nounona vavo.
Ounona voukadona vatatu ova lopotwa neudo va pewa omateelelo kooxe omanga vamwe ohava pewa omateelelo kovamwainamati. Neudo moshitukulwa shaMusati omwa lopotwa omulumenhu vati a kwata okaana kaye keemwedi nhatu onghonga. Opolifi oya ti ounona voukadona kave li vali meameno ngeenge ve li momaumbo novalumenhu.