Ovakainhu ve lihumbata noshoyo ovakulupe va kalela ovapambele vavo koipangelo otava mono oixuna koutalala, eshi vahapu vomuvo tava nangala pomahalandjadja shaashi oipangelo konooli kai na eenhele da wana doku va nangeka, omanga vamwe kave na oshimaliwa shokufutila eenhele odo.
Kewalanda kOnandjokwe oko akuke ku na ovakainhu ve na omateelelo ve li 20 nohava nangala pedu meni lewalanda omanga ovakulupe 22 navo ohava nangala pedu mewalanda va yala po omapakete.
Ovakainhu 73 ohava nangala keembete naashi osha eta opo mewalanda mu kale ovakainhu ve lihumbata 93 kumwe.
Ewalanda onhele oyo hai kala ovakainhu ve li momateelelo hava ka teelela ngeenge ve li popepi nokupulumuna.
Ewalanda ohali kwafele unene ovakainhu hava di komikunda dokokule shaashi ngeenge tava fetwa ihava ende vali oshinano shile molwaashi ola tungwa li li popepi noshipangelo.
Pefimbo Kundana a talela po ewalanda Etine, Hileni Nehale weedula 66 a ka teelela omona waye a tambulilwa meembete okwa hokolola ta ti okwa ninga eemwedi mbali ta nangala pedu mewalanda.
“Tete okwa li handi nangala koshi yomuti oule womwedi ashike eshi outalala wa tameka onda kufwa ko opo ndi ka nangale meni lewalanda pedu,” Nehale ta hokolola.
Nehale okwa hokolola ta ti oha nangala ta dengwa koutalala nokwa ningwa paife oipute shaashi okwa lika keemwe.
Selma Andreas weedula 71 naye a kalela ondenge yaye ya tambulilwa moshipangelo, okwa hokolola ta ti okwa ninga eemwedi nhatu ta nangala pedu mewalanda molwaashi kamu na sha eembete da wana.
“Otwa lombwelwa kutya mewalanda kamu na eembete da wana molwaashi omoyadi ovakainhu ve ya okuteelela okupulumuna,” ta ti.
Okwa ti kashipu okunangala pedu pa yalwa oipakete unene tuu pefimbo loutalala u li metifa.
Elizabeth Saulu e na eteelelo leemwedi omuwoi okwa ti paife okwa nyika onughudi mombuda molwaashi ha nangala pedu pe na omalambo.
“Otu li moudjuu, ohatu monene mo oixuna mewalanda omu. Kashipu komukainhu e na eteelelo lakula ndele oha nangala pedu,” Saulu ta hokolola.
Okwa weda po ta ti paife ohava nangala pedu pa finana shaashi ova pewa okanhele kashona ke li mewalanda opo hava nangala.
Omukulunhuwiliki wouhaku moshitukulwa shaShikoto Josua Nghipangelwa okwa koleka ta ti ovakainhu otava dengwa koutalala unene tuu ovo hava nangala pedu.
Nghipangelwa okwa ti mewalanda kamu na eembete da wanena ovakainhu aveshe, onghee naashi osha eta opo ovakainhu vamwe va nangale pedu.
Okwa weda po ta ti eshongo loshimaliwa olo unene tali imbi ewalanda li kale la tulwa oikwafifio ya wana.