Ominista yuunamapya omeya netopolo lyevi, Calle Schlettwein, okwa fala komutumba gwopashigwana ontotwaveta ndjoka tayi lalakanene oku kwatela mo onyama yiikwamawawa moveta tayi wilike oshikondo shonyama.
Sho a tameke oku gandja omalunduluko omape koveta ndjoka yali ya totwa po momumvo 1981, Schlettwein okwa ti ekwatelomo lyonyama yiikwamawawa mokatendo hoka otali ka kwathela Namibia opo a yambule po oshikondo shiikwamawawa.
Ta ti okatendo hoka otaka ka eta woo elunduluko kedhina lyehangano hali ungaunga niikwanyama lyoMeat Board of Namibia nedhina epe okwa dhiladhilwa lika ninge Livestock and Livestock Products Board of Namibia, opo li kwatele mo iimuna ayihe niikwamawawa ayihe niilongwamo hayi zi miinamweyo mbyoka.
“Ekwatelomo lyiikwanyama niikwamahini moveta tayi wilike oshikondo shonyama ngashingeyi otali kwa kwathela ehangano lyoMeat Board of Namibia opo li vule oku ndalapatela eetomo lyiilongwamo hayi zi kiimuna noshowo kiikwamawawa, noshowo okulonga nomashongo gopaveta ngoka ga kala ga taalela oshikondo ethimbo ele,” ta ti ngaaka.
Schlettwein ta ti Namibia oha eta mo iikulya oyindji, unene tuu iikwamahini, iilongwamo yonyama yoshingulu, oshowo iikwamawawa. Ta ti osha simana oshikondo shoka opo shi tampununwe mo, shi koke sho shi vule oku kala tashi longo iikulya nenge iikwanyama yagwana opo oshilongo shi vule okuipalutha sho shene.
Ta gwedha ko kutya, omapekapeko ganingwa otaga ulike kutya uuwindji wiikulya niikwanyama hayi zi kiimuna moshilonga owa gwana oku tekela noku kokeka oshikondo shoka, unene tuu ngele oondando dhiikulya odha tulwa po dha ikolelela koondando dha tulwa po koSouthern African Customs Union opo kaadhi dhengele aalandi konankondongolo.
“Meat Board of Namibia ngashingeyi okwa koka, noku na ontseyo ya gwana oku ungaunga niinima ya fa mpoka. Sha ikolelela kontotwaveta, ‘Livestock and Livestock Products Board of Namibia’ otayi ka kwatha oshilongo opo shi ete po iilongwamo yagwana, sho shi ete niilonga moshilongo,” Schlettwein ta ti.
-Nampa