Festus Hamalwa
Omukainhu weedula 30 okwa kwatwa po konima eshi vati a yasha nokumonifa oshiponga omukainhu womushiinda shaye mepepe nondjebo. Oshiningwanima eshi osha ningwa mexuliloshivike modoolopa yaKahandja efimbo lomutenya. Omupopiliko wopolifi moNamibia omupedukomufala Kauna Shikwambi okwa hokolola ta ti omufekelwa okwa vaka ondjebo mofaalama yamushiinda shaye.
Vati efiku tuu olo omufekelwa okwa li yoo vali a hala okuyasha omulumenhu wanakuninga oshihakanwa, ashike ondjebo oya nyekwa ko diva. Nakuninga oshihakanwa okwa twalwa koshipangelo noku li a tambulilwa meembete ta mono epango.
Opolifi oya weda po tai ti mwene wondjebo omukulupe weedula 71, nokwapatululilwa oshibofa molwouhasha wokutula ondjebo yaye poluhaela.
Oshiningwanima shikwao, omulumenhu weedula 40 okwa tambulilwa moshipangelo konima eshi a yashwa komaulu kovanambelewa vopolifi.
Oshiningwanima eshi osha ningwa koTsandi moshitukulwa shaMusati mexuliloshivike. Opolifi oya hokolola tai ti nakuninga oshihakanwa okwa yashwa pefimbo lopolifi kwa li tai ningi oshikonga shokulwifa oimbuluma.
Vati ovakwashiwana ova lopotela opolifi kombinga yovalumenhu vavali tava ende oufiku konima yomakuma. Otaku hokololwa kutya ovakwashiwana okwa li va limbililwa kovalumenhu ava.
Okudja opo opolifi oya ufana ovalumenhu ashike inava hala okukanghama onghee vati ova faduka po. Vati opolifi oya umba eeholo mbali mombada ashike ovalumenhu ova twikila nokufaduka po. Opolifi oya ti naashi osha ka eta opo omulumenhu umwe a kale a yashwa mokaulu.
A ehamekwa… Omukainhu mokakuma eshi vati a yasha nodjebo omukainhu mukwao mepepe.