Festus Hamalwa
Ovakwashiwana moshikandjohoololo shaNesi noTsandi ove li moumbada weendjaba hadi kala alushe tadi tavakana momapya avo. Okwa didilikwa oshikandjohoololo shaNesi noTsandi oyo imwe hai ponokelwa kookahenge.
Kansela woshikandjohoololo shaNesi Festus Petrus okwa hokolola ta ti ovakalimo vomoshikandjohoololo shaye ova lulilwa keendjaba da lopotwa de liteyela momikunda nhee moshikandjohoololo shaye.
Okwa ti oshivike sha dja ko okwa lopototwa eendjaba nhee momikunda ngaashi okaonde, nOshikondailongo nosho konima eshi da ponokela omaumbo ovakwashiwana. Petrus okwa ti eendjaba oda longela ovakwashiwana omunyonena eshi da teya po omaumbo avo tadi kongo oikulya ngaashi omatanga.
“Ounona vashona ove na omhito yokuponokelwa keendjaba ngeenge tava di kofikola molwaashi ihava dulu okulotoka ngeenge ova hangika keendjaba,” ta ti. Okwa weda po ta ti ovakulupe ove na oumbada wokuponokelwa keendjaba ngeenge tava di keenhele dokukwatela opendjela.
Onghee okwa ti eshi oshi li sha nyika oshiponga ngeenge ondjaba oya hange omukulupe ta ende oye auke moixwa ile a hangika meumbo shaashi omukulupe iha dulu okulotoka.
Pefimbo a ninga eenghundafana naKundana kansela woshikandjohoololo Tsandi, Junias Amunkete okwa hokolola ta ti oshiwana inashi manguluka vali ngeenge tashi ende moixwa ile ngeenge sha nangala molwaashi hashi kala sha kwatwa koumbada wokuponokelwa keendjaba.
Okwa yelifa ta ti kape na omunhu a lopotwa a xulifa ile omonifwa oshiponga keendjaba fiyo opapa. “Ovanambelewa va dja kouministeli womidingonoko nomatalelepo ove lihanena moshikandjohoololo shetu tava konakona eendjaba noshoyo okukula ve di shingila kokule,” ta ti.
Okwa kumaida oshiwana opo shi kale a ushe tashi lopotele ombelewa yaye diva ngeenge sha mona eendjaba opo a dule okulopotela ovanambelewa hava longo noifitukuti.
Amunkete okwa yelifa ta ti fiyo opapa ka pena omunhu a lopotwa a monifwa oshiponga ile a dipawa keendjamba.
Omupopiliko mouministeli womidingonoko nomatalelipo Romeo Muyunda, okwa ti eli olo efimbo leendjamba di hole okuendaenda eshi ha di kala ta di kongo omeva noikulya.
Muyunda okwa ti oshiwana nashi xulife po okutula omatanga, omanuwa nomanyangwa poluhaela shaashi eshi otashi nane eendjaba di kale da ponokela omaumbo avo.
“Ovanambelewa vetu ove lilongekida efimbo keshe onghee osha fimana opo oshiwana shi kale tashi lopotele opolifi nookansela,” Muyunda ta ti.
Muyunda okwa kumaida oshiwana opo shiha taataye eendjaba ile oku di denga shaashi ondjaba otai dulu okutanauka ndele tai va ponokele.
Okwa weda po ta ti ovanhu nava xulife po okukala tava ende oufiku ngeenge tava di keendingosho shaashi ngeenge kwa laula omunhu ita dulu okumonena ko ondjaba diva.