Omulumenhu weedula 39 okwa monifwa oshiponga noku vakwa oimaliwa yaye vati kovapolifi vaNamibia, pefimbo a li ta kendabala oku tauluka eengaba a ye moAngola
Oshiningwanima eshi osha ningwa oshivike sha djako kOshikango. Eshi tashi kumwifa oshosho kutya kape na oshibofa sha patululwa, na nakuninga oshihakanwa ota ti okwa ningilwa omatilifo kopolifi opo a ha patulule oshibofa.
Teteipo Lucas oo e li omukwashiwana waAngola okwa hokolola ta ti okwa mona oshiponga eshi a dengwa noku yashwa kopolifi neeholo domakenya, nokwa kufwa yoo ondjato yaye yoimaliwa omo kwa li mu na oshimaliwa sho N$2030. Omukwatakanifi koshikondo shokukonakona oimbuluma mopolifi mOhangwena omupedu Commissioner Zachariah Amakali okwa ti ombelewa yaye otai ka ningila omakonakono ovapolifi koshitaashi shopolifi kOshikango nOkakwa.
“Onda tuma nale ovakonakoni vopolifi keumbo oku kuna Teteipo opo a kale a yandja ouyelele we lixwa po,” Amakali ta ti. Teteipo Lucas omukwashiwana waAngola okwa hokolola ta ti okwa hangika a yuka ka komukunda Omunyekadi moshitukulwa shaHangwena ta ka talela po ofamili yaye eshi ovanambelewa vopolifi vatano mwa kwatelwa omukainhu umwe ve li motuwa yopolifi va fikama tave mu pula kutya oshike oshi li mondjato yaye. Okudja po ovapolifi ova hada mondjato yaye omo mwa li omakaya nomalodu ouwhiskey.
“Ova londeka nge motuwa yavo tava shing va yuka moixwa lwokeengamba. Ova fikama tava ova kufa nge ondjato yange yoimaliwa noshoyo ondjato omo kwa li muna omakaya nomalodu ouwhiskey,” ta hokolola. Teteipo okwa ti umwe womupolifi okwe mu denga eenghava nokonima eshi a pula odjato yaye yoimaliwa, omupolifi umwe okwe mu ya sha moshipala lwoikando ihapu konima umwe okwe mu lyata medimo. “Ova ti kandi na oufemba wokupula oinima yange.” “Ovapolifi okwa li va hala okufiya nge moixwa ashike okwa ka dja ovakwashiwana tava pula opolifi kutya omolwashike tai fiye nge moixwa ngeenge oyo ya monifa nge oshiponga,” ta ti.
Okwa ti okudja opo opolifi oye mu twala koshipangelo kEngela oko a ka tuminwa koshipangelo shaShakati.
Ta ti paife okwa lekelwa moshipangelo shaShakati noku li kOmunyekadi keumbo lofamili yaye oku a hangika a yuka. “Konima eshi da lekelwa moshipangelo onda ya koshitaashi shopolifi kOshikango handi pula eendjato dange. Omukulunhu woshitaashi sholifi pOshikango okwa lombwela nge ta ti oinima yange oili koshitaashi shopolifi kOkakwa shaashi ovapolifi ava va sha nge ova dja kopolifi kOkakwa,” ta ti.
Okwa ti okudja opo okwa ya kopolifi kOkakwa noku pewa ondjato yaye yoimaliwa ashike okwa hanga mo ashike oN$20-00 omanga oshimaliwa N$2010 osha kufwa mo. “Ondjato yange yoikutu ina ndi i pewa, omakaya nouwhiskey vali mondjato kandi shi kutya ova tulwa peni,” ta ti. Teteipo okwa indila opolifi opo i kale ya ningila ovapolifi omakonakono ovo kwa li tava longele keengamba efiku olo 21 Marisa shaashi ova longifa oulingilingi noumbudi.
“Ovapolifi ova lombwela nge kutya ngeenge onda patulula oshibofa ohandi kwatwa po shaashi kandina sha omaufemba mokukala mOnamibia, ame vali onda hangika nomakaya nouwhiskey,” ta ti.
fhamalwa@nepc.com.na