Epangelo lyaJapan oshiwike sha zi ko olya yambidhidha osikola yopaungomba, Zambezi VTC niilongithomwa yopautekinika yongushu yoshimaliwa shoomilliona N$50.
Omayambidhidho ngoka oga gandjwa okupitila moprogalama tayi ithanwa “Japanese Economic and Development Programme to Namibia” ndyoka ya li ya shayinwa muSepetemba momumvo 2020.
Minista gwelongo lyopombanda Itah Kandjii-Murangi okwa ti osikola yopaungomba otayi dhana onkandangala melongekidho lyonakuyiwa yoshilongo shaNamibia, oshowo okuyambula po eliko lyoshilongo.
“Oosikola dhopaungomba odha simana oshoka ohadhi dheula aalongwa nuunongo mboka tau opalele onakuyiwa,” ta fatulula ngaaka. Ta gwedha po kutya elongo lyopaungomba olya totha mo esimano lyeilongo nokweeta po iilonga opo wo yalwe ya mone iilonga.
Ta ti, uunongo wopaungomba otau yambidhidha oshilongo mokweeta po iilonga moshigwana. “Osikola yopaungomba oya simana noonkondo oshoka otayi thaneke nokulongekidha aanyasha nonakuyiwa ya pala, omolwuunongo ya mono oshowo ya tseya, ya vule okukala oongandi noontumba momimvo dhokomeho,” ta fatulula ngaaka.
Ominista yomayambulepo goondoolopa niitopolwa yokuushayi Erastus Uutoni okwa li a fatulula kutya aailongi oyendji ohaya hogolola uulongelwe wiinyangadhalwa yomoombelewa, oshoka oyendji oya landula iimpungu yoludhi ndoka kiiputudhilo yopombanda.
“Aanyasha taya zi moongundu dhahugunina natango kaye na ontseyo ya gwana yesimano lyiilongwa yopaungomba, mbyoka itaayi ya kalitha ethimbo ele momapandaanda konima yeilongo lyawo,” ta fatulula ngaaka.
“Ngele otwa hala lela oshigwana sha putuka nena otu na okudhenga omuthindo mokuyambula po iiputudhilo ngaashi oo-VTC nokukwashilipaleka kutya iiputudhilo yuungomba yilwe, niilonga yokoonyala otayi taamba aayilongi oyendji yi vule iiputudhilo yilwe,” Uutoni ta kumagidha ngaaka.
-vkaapanda@nepc.com.na