OMHEDI- Ohamba yOvakwanyama Martha Mwadinomho yaKristian Nelumbu okwa pula opo a kongifwe ko komutwe wohamba Mandume yaNdemufayo.
Edi Nelumbu okwe di popya efiku ledimbuluko leedula 107 dedimbuloko lefyo laMandume, sha li kOuhamba kOmhedi Olomakaya.
Ndemufayo okwa dalwa momudo 1893 nokuxulifa momudo 1917 mepipi lomido 23. Ohamba ei taku tengenekwa yali ohamba onhi-19 yOvakwanyama oya fya, yeli dipaa pefimbo yali tai lwifa Ovaingilisha nOvaputu ovo vali tava kendabala oku kufa ko Oukwanyama.
Okwa fudikwa pOihole moAngola.
Oonaku dipaa mandume ova teta ko omutwe waye ndele tava i nao. Hano okwa fudikwa ehe na omutwe.
Efiku olo Ohamba Nelumbu noshiwana okwa li yoo vali va talela po omaendo opo pa fudikwa eehamba mwa kwatelwa Ohamba itivali Mwetupunga Shelungu.
Ohamba Nelumbu okwa li tai kwena no ya nyika oluhodi pefimbo kwa li tai tula eengala keembila deehamba odo da tekela tete.
Nelumbu okwa ti ka shi pu kuye oku li pula eehamba odo da xulifa pefimbo kwa li tadi elele oshitunda shaUkwanyama.
Okwa kumaida oshiwana shi kale nombili ngaashi naana Ohamba Mandume kwa li i hole oshiwana shi na ombili.
“Ndemufayo okwe tu fila etumwalaka ta ti: omitima detu nadi ye mumwe, eemwenyo detu nadi lumbakane,” Nelumbu ta ti.
Okwa ti efiku e li ota li ka la ta li dimbulukwa omudo keshe okuyandja efimaneko kuNdemufayo.
“Osha fimana opo ounona novanyasha va kale ve shi ondjokonona yOhamba Ndemufayo,” ta ti.