Omukiintu gumwe si sho a dhegwa noshitako shondjembo moshipala, omukwao okwa tsuwagulwa noombele sigo omeso nomutitatu okwa hupile meyulu lyonane sho a tetwa nomakatana.
Ayehe mbaka oya ningilwa omahepeko noku dhipagwa mehuliloshiwike kookuume kawo kopaihole.
Mbaka oya gwedha komiyalu dhiihakanwa yomahepekathano gomomagumbo yili 11075 yokuza momumvo 2022 sigo omuJanuali 2024, mbyoka ya lopota iipotha yayo.
Mehuulilo shiwike, opolisi moshitopolwa shaKhomas oya manga po omulumentu gwomimvo 32 omulongisikola, sho a dhipaga kuume ke kopayihole.
Opolisi oya lopota kutya omulumentu ngoka ha longo osikola koGroot-Aub Primary okwa tsu nombele omukiintu gwe gwedhina Charlien van Wyk noku sa. Anuwa Van Wyk nomulumentu goka oyali yuuvika taya nyenyeta omanga yeli meni lyombashu. Olutu lwaVan Wyk lwa lala pomweelo gwombashu lu na ombululu montulo kombinga yokolumoho.
Omulogisikola ngoka okwa kwatwa po.
Omunamimvo 29, Hilya Tulinawa Nekongo a zile komukunda Ohalushu moshitopolwa shaHangwena, okwa dhipagwa kuSimeon Lotete (30), a zile kOlupito mOmusati ngoka a li kuume ke komiihole. Lotete okwiikutha omwenyo, konima a longo iilonga mbyoka.
Otaku hokololwa kutya ookume mboka okwali taya nyenye ethimbo lyokoongulasha oku pendulila Osoondaha. Lotete anuwa okwali ayi pomukeeleli gwomaliko ngoka a li miilonga noku muyakula ondjembo.
Sho a yakula ko ondjembo okwa tameke oku tidha Nekongo, na sho e mu adha okwe mu dhenge momupolo noshitako shondjembo, noku sa. Okuza mpoka okwa fadhuka po e teki imangeleka.
Omukiintu gwomimvo 31 okwa ningi omunelago sho kwali a henukwa nomakatana, sho gumwe a li a kelele kuume ke kopayihole.
Oshiningwanima shoka osha holoka momukunda omusheshe osoondoha.
Omulumentu ngoka okwali a kambandhala okudhipa omukiintu gwe nomakatana, no kwali a falwa komumwayina gomumati kopolisi konima a longo iilonga mbyoka.
Otaku hokololwa kutya omukiintu ngoka okwali a lombwele omulumentu ngoka kutya okwa hala ya hulithepo ekwatathano lyopayihole, shoka anuwa shali sha geyitha omulumentu ngoka.
Okwa kalekwa konima yekumba.
Nonando kakukutu komatango Joseph Shikongo okwali a kumagindha aalumentu ya hulithe po omahepeko goomeme, omakumagindho ngoka otaka wile momatsi gathita.
“Opolisi oya lopotelwa iipotha yomahepeko goomeme naanona yili 6 260 okuza momumvo 2022 sigo Malitsa gomumvo 2023. Omanga okuza momwedhi Apilili 2023 sigo Januali 2024 mwa lopotwa iipotha 4 815,” Shikongo ta totha mo ngaaka.
Shikongo okwali a kumagidha ngaaka esiku lyendhimbuluko lyomeme muuyuni ndyoka hali ndhimbulukiwa omumvo kehe momasiku 08 gaMalitsa.
Esiku ndyoka okwali a holola euvo nayi omolwa iipotha yomahepeko gomeme naanono yili pombanda.
Ta ti, okwa pumbwa oku kuthwa omatokolo ngoka taga vulu okulwitha omahepeko momagumbo.
Ta gwedhapo kutya omahepeko inaga pitikwa moNamibia, oshowo oga pumbwa okulopotwa opo ku kuthwe onkatu naa ngoka tega ningi a pewe egeelo.
–vkaapanda@nepc.com.na