Uuministeli wiikwameni owe shi pondola oku gandja uumutse oshowo oonzapo dhomavalo kaantu 24 000, muule womwendhi gumwe.
Omugandji gwomauyelele muuministeli wiikwameni, Margaret Kalo, okwa ti oya ya tameke no progalama yoku gandja uuthemba kwaamboka yaana sha okuza momasiku 05 gaFebuluali noshinyangadhalwa shika otashi ka hula mo30 yaJuli nuumvo.
“Ota tu gandja uuthemba miitopolwa ayihe 14. Otwa ndhindhilike twa gandja oonzapo dhili 9 881 nuumutse wuli 14 511 okuza mu Febuluali nuumvo,’’ ta fatulula ngaaka.
Kalo ota kumagidha oshigwana miitopolwa ayihe yili 14, opo shi longithe ompito ndyika okumona uuthemba, naamboka ya kanitha uuthemba wawo, naya ningulule omayindilo.
Ta ti, kehe ngoka taka ninga eyindilo lyokamutse nenge lyonzapo yevalo oshikando sho tango, ita futu sha.
“Mboka taya ningi omayindilo guumutse olutiyali nenge iikando ya kola po pu iyali, otaya futu N$150 omanga mboka taya ningulula omayindulo goonzapo dhomavalo taya futu ashike N$100,” ta fatulula ngaaka.
Kalo okwa kwashilipaleke kutya uuministeli womagumbo otawu tsikile okulonga nuundhiginini opo kehe omunamibia a kale ena uuthemba.
Ta ti, uuthemba owo olisinisa yomuntu kehe, okukwashilipaleke kutya okwa yambukile peni oshowo uukwatya womuntu.
-vkaapanda@nepc.com.na