Omukondjelimanguluko John Ruben Amakali a shivika nawa Nakaundule okwa pakwa Olomakaya konhele haku fudikwa omapendafule kEenhana Shrine.
Amakali okwa xulifa 06 Marisa koshipangelo shaKongo, mepipi lomido 73.
Omupresidente Nangolo Mbumba moshipopipwa shaye sha leshwa kukansela Erickson Ndawanifa, okwa tanga Amakali onga a li omulumenhu ha longo noudinini nokwa dana onghandangala ya kula pefimbo lekondjelo manguluko.
“Omulumenhu ou okwa kufa yoo vali ombinga mekondjelomanguluko pefimbo loita. Otwa ka nifa ependafule, omunambili,” ta ti.
Omukokoli-presidente Sam Nujoma okwa ti pefimbo loita Amakali okwa kala ta xwaxwameke ovakwaita va longe nondjungu mokulwifa epangelo lokatongotongo.
“Amakali okwa li omukondjelimanguluko woshili, ka kwa li e hole eembulu dokatongotongo,” ta ti.
Nujoma okwa hokolola ta ti Amakali okwa li eli tula mo momadeulo aye pefimbo kwa li a tumwa koAngola.