Omulumenhu weedula 26 okwa ponokelwa kookalyamupombo ve li ninga ovatwaalelwa, ndele ta dengwa nokunyekwa otuwa yaye.
Oshiningwanima eshi osha ningwa mOsoondaxa komukunda Omakango popepi lodoolopa yaNdangwa efimbo loufiku.
Omupopiliko wopolifi moshitukulwa shaShana Chief Inspector Thomas Aiyambo okwa hokolola ta ti nakuninga oshihakanwa okwa lefwa kovalumenhu vatatu mOndangwa tava ti ova yuka poshiitashi shomahooli pOmwandi.
Manga ve li mondjila omulumenhu umwe okwa nukila nakuninga oshihakanwa ndele te mu denge enghava noku mu kufila mo eembele.
Opolifi oya hokolola tai ti nakuninga oshihakanwa okwa ningilwa omatilifo efyo nokonima okwa lombwelwa a kanghameke otuwa yaye pomukunghulo wopate.
Okudja opo vati okwa dulwa okambidja kaye ndele ta mangwa nako kokanya, komesho, keenyala nokomaulu.
Opolifi oya hokolola tai ti ovafekelwa ovashinga po otuwa yaye nokonima ove mu twala moixwa komukunda Omakango.
Nakuninga oshihakanwa okwe li tuwa kovakwashiwana va hangika va uka koilonga efimbo lokeengulasha.
Otuwa yaye oToyata Passo yonomola N34605ND, ina oluvala limbulau.
Opolifi oya ti otuwa fiyo paife ina i monika onghee oshiwana otashi indilwa opo shi lopotele opolifi keshe i li popepi.
Ota ku hokololwa kutya otuwa oya uka kombinga yaShikango lwokeengamba.
Opolifi oya kumaida ovashingi veetuwa opo va kale va kotoka ngeenge tava twalele ovanhu molwashi ovatwalelwa vopaife ove li ninga ookalyamupombo.